ՀՀ առևտրաարդյունաբերական պալատի և միջազգային մասնավոր ձեռնարկատիրության կենտրոնի (CIPE) բիզնես ոլորտում իրականացված հարցման արդյունքում՝ Հայաստանում ձեռնարկությունները թուրքական ծագման ապրանքների ներմուծման արգելքը ճիշտ որոշում են համարում, սակայն բիզնեսի տեսանկյունից որոշ ընկերություններ անպատրաստ էին դրան:
Մայիսի 31-ին լրագրողների հետ ճեպազրույցում այս մասին ասաց «Այ Էմ Առ» հետազոտական կազմակերպության տնօրեն Պետրոս Պետոյանը:
«Օրինակ, արդյունաբերական ընկերությունները կամ կարի հետ կապված ընկերությունները, որոնք հումքը ներկրում էին Թուրքիայից, լիովին անպատրաստ էին դրան: Իրենց համար արգելքը մեծ խոչընդոտ դարձավ»,- ասաց Պետոյանը:
«Այ Էմ Առ» հետազոտական կազմակերպության տնօրենի խոսքով՝ ձեռնարկությունները ցանկանում են պետությունից աջակցություն ստանալ կամ գոնե խորհրդատվություն այլընտրանքային ուղղությունների մասով, թե որտեղից կարելի է ներկրել հումքը:
«Ձեռնարկությունները ի սկզբանե արգելքը պատկերացնում էին, որ ցանկացած բան չի կարելի Թուրքիայից ներկրել Հայաստան: Այսինքն՝ պետական կառույցների կողմից պետք է ճիշտ տեղեկություն տրամադրվի և այս ընկերություններին բացատրվի, որ հումքը կարելի է ներկրել, բայց պատրաստի ապրանքներ՝ ոչ»,- նշեց Պետոյանը:
Ինչպես նշված է ամփոփ զեկույցում, ձեռնարկությունների շուրջ 35 տոկոսը համարում է, որ թուրքական ծագման ապրանքների ներմուծման արգելքը որևէ խոչընդոտ չի ստեղծի ՀՀ և իրենց ձեռնարկությունների համար:
«Այս արգելքի հետ կապված ձեռնարկություններն առավել շատ տեսնում են հնարավորություններ և դրական կողմեր, քան խոչընդոտներ և բացասական ազդեցություններ ՀՀ և իրենց բիզնեսի համար»,- նշված է զեկույցում:
Հետազոտության նպատակը հայաստանյան գործարար համայնքի ներկայացուցիչների կարիքների և առաջնահերթությունների վերհանումն է: Հետազոտությունն իրականացվել է ՀՀ առևտրարդյունաբերական պալատի և Միջազգային մասնավոր ձեռնարկատիրության կենտրոնի (CIPE) համագործակության արդյունքում:
Հետազոտության համար իրականացվել է քանակական դեմ առ դեմ հարցում Հայաստանում գրանցված և գործող 400 ձեռնարկության շրջանում՝ կիսաստանդարտացված հարցերի կիրառությամբ: Տվյալների հավաքագրումն իրականացվել է 2021 թվականի փետրվար-մարտ ամիսներին: Ուսումնասիրության ոլորտներն են բիզնեսի հիմնախնդիրները և առաջնահերթությունները, ձեռնարկությունների վրա համավարակի և Արցախյան 44-օրյա պատերազմի ազդեցությունը, կոռուպցիայի նկատմամբ գործարար համայնքի ընկալումները, պետական աջակցության ծրագրերի արդյունավետության գնահատումը:
