ԱՄՆ-ի Սննդամթերքի և դեղամիջոցների որակը վերահսկող վարչությունը (FDA) հաստատել է բրիտանական GSK (GlaxoSmithKline) դեղագործական ընկերության և նրա ամերիկացի գործընկեր Vir Biotechnology-ի կողմից COVID-19-ի բուժման համար Sotrovimab (VIR-7831) դեղամիջոցի կիրառումը: Այս մասին ասվում է չորեքշաբթի օրը դեղագործական կարգավորողի կայքում հրապարակված հայտարարության մեջ:
Նշվում է, որ դեղամիջոցը թույլատրվում է մեղմ և միջին ծանրության COVID-19-ի բուժման համար՝ 12 տարեկան և բարձր տարիքի մեծահասակ հիվանդների և դեռահասների մոտ, որոնց քաշը գերազանցում է 40 կգ-ը: Sotrovimab-ի օգտագործումն արգելվում է այն հիվանդների համար, որոնք կորոնավիրուսով հոսպիտալացվել են կամ որոնց համար թթվածնային թերապիա է պահանջվում:
VIR-7831-ը դեղամիջոց է, որը հիմնված է մեկ տեսակի մոնոկլոնալ հակամարմինների վրա. դրանք իմունային համակարգի կողմից մշակվող կլոնավորված մոլեկուլներ են, որոնք ունակ են կապել և չեզոքացնել որոշակի հիվանդության հարուցիչը: Մարտին դեղամիջոցն արտադրողները հաղորդել են, որ COVID-19-ով հիվանդները լավ են տանում թերապիան: Կլինիկական փորձարկումները կշարունակվեն, և հիվանդների վիճակը կվերահսկվի 24 շաբաթ:
GSK-ն ու Vir-ը փորձարկում են նաև մեկ այլ մոնոկլոնալ հակամարմին՝ VIR-7832, որը պետք է ակտիվացնի T-բջիջների իմունիտետի աշխատանքը COVID-19-ի դեպքում:
