Ռազմական փորձագետ Արծրուն Հովհաննիսյանը և քաղաքագետ Հրանտ Մելիք-Շահնազարյանը այսօր լրագրողների հետ հանդիպմանը անդրադարձան երեկ Սոչիում կայացած Մեդվեդև-Ալիև հանդիպմանը:
Մելիք-Շահնազրայանի գնահատմամբ՝ Ալիևին Սոչի հրավիրելը նշանակում է, որ բանակցային գործընթացում խնդիրներ հարուցողը ադրբեջանական կողմն է, և միջնորդներն այժմ կարևոր խնդիր ունեն լուծելու Ադրբեջանին դարձյալ բանակցային դաշտ վերադարձնելու առումով: Քաղաքագետի խոսքերով՝ երեկվա հանդիպման արդյունքների մասին կարելի կլինի խոսել միայն՝ հետևելով ՀԱՊԿ անդամ երկրների ոչ պաշտոնական հանդիպման ընթացքին. «Եթե այնտեղ խոսք գնա, որ առաջիկայում պետք է կազմակերպվի եռակողմ հանդիպում, ապա կարելի կլինի ասել, որ Ադրբեջանի հետ ինչ-որ համաձայնություն ձեռք է բերվել: ՀԱՊԿ ոչ պաշտոնկան հանդիպումը կլինի այն առաջին ինդիկատորը, որը ցույց կտա երեկ տեղի ունեցած բանակցությունների արդյունքները»:
Ռազմական փորձագետ Արծրուն Հովհաննիսյանը, համաձայնելով իր գործընկերոջ գնահատականների հետ, հավելեց, թե Ալիև-Մեդվեդև երեկվա հանդիպումը ապացուցում է, որ Կազանում բանակցությունների տապալողը հենց Ադրբեջանն է եղել, և Մեդվեդևը հոգնել է եռակողմ հանդիպումներ կազմակերպելուց՝ առանց նախնական վստահության, որ բանակցային գործընթացում տեղաշարժ կլինի: «Մեդվեդև-Ալիև հանդիպումը ցույց տվեց, որ Ադրբեջանի հետ կան խնդիրներ, և մինչև դրանք չհստակեցվեն, չարժե եռակողմ ֆորմատով բանկցություններն առաջ տանել»,- կարծիք հայտնեց փորձագետը: