Հանուն Հանրապետության կուսակցության ղեկավար մարմնի անդամ Արտաշես Խալաթյանը ֆեյսբուքյան իր էջում գրել է․ Արցախյան հակամարտության ավելի քան 20-ամյա անփառունակ բանակցային էպոպեան ցույց է տալիս, թե ինչ չարիք է ավտորիտար կառավարումը՝ առանց հակակշռիռների և զսպումների, առանց գործունակ խորհրդարանի, ով կվերահսկեր Նախագահի և կառավարության կողմից վարվող արտաքին քաղաքականությունը, առանց անկախ ԶԼՄ-ների, որոնք լրագրողական հետաքննության, հրապարակումների, իշխանության ներկայացուցիչներին տրվող հարցերի միջոցով համակողմանիորեն կլուսաբանեին բանակցային գործընթացը և հասարակության տեղյակ կպահեին, թե ինչ է կատարվում իրականում, և ինչ է քննարկվում բանակցությունների ժամանակ։
Եվ երբ խոսում են այն մասին, թե նախկինում, նախքան 2018թ․ ամեն ինչ լավ էր, բանակցությունները լավ էին ընթանում և այլն, հարց է առաջանում՝ իսկ ո՞վ գիտեր՝ ինչ է քննարկվում բանակցությունների ժամանակ, ու՞մ էր ընդհանրապես թույլատրված ուղիղ խոսել Արցախյան հարցի շուրջ, ո՞ր կուսակցությունն էր իրականում, թերևս բացի ՀԱԿ-ից, մինչև 2018թ․ ռիսկ արել իր հստակ ծրագիրը ներկայացրել Արցախյան հարցի ողջամիտ կարգավորման վերաբերյալ։
Եվ երբ այս ամենը վերլուծում ես, հասկանում ես, որ ամեն ինչ այս աշխարհում գտնվում է պատճառահետևանքային կապի մեջ․ չի կարող ավտորիտար և կոռումպացված քաղաքական ռեժիմի պայմաններում բանակը լինել մարտունակ, լավ զինված, երկրի արտաքին քաղաքականությունը լինել ինքնաբավ և հայանպաստ, երկրում մոլեգնող քրեական բարքերի պայմաններում բանակում իշխել հայրենասիրական ոգին և զինվորական կարգապահությունը և այսպես շարունակ։
Ուրեմն՝ ժամանակն է հանդարտ, սառնասրտորեն, ատամները կրճտացնելով՝ սկսել Հայաստանի արդիականացումը, հանրային համերաշխության հաստատումը և ուժեղ ու կարողունակ Հանրապետության ստեղծումը։