Ազգային ժողովն առաջին ընթերցմամբ ընդունեց «Ժամկետային զինվորական կամ այլընտրանքային ծառայության հերթական զորակոչից, վարժական հավաքից կամ զորահավաքային զորակոչից խուսափած անձանց նկատմամբ համաներում հայտարարելու մասին» կառավարության հեղինակած օրենքի նախագիծը:
Օրինագծին կողմ քվեարկեց 85 պատգամավոր։
Նախագիծը հնարավորություն է ընձեռում ծառայությունից խուսափած անձանց վերադառնալ հայրենիք և սեփական ավանդը ներդնել մի շարք ոլորտների զարգացման գործում:
Համաներում է նախատեսվում մինչև 2020 թվականի սեպտեմբերի 26-ը ներառյալ 27 տարին լրացած շարքային և 35 տարին լրացած պահեստազորի սպայական կազմերի պարտադիր զինվորական կամ այլընտրանքային ծառայությունից, ինչպես նաև հայտարարված վարժական հավաքից և զորահավաքային զորակոչից խուսափած և ՀՀ քրեական օրենսգրքի միայն 327-րդ հոդվածի 1-ին մասով նախատեսված հանցագործություն կատարելու մեջ կասկածվող, մեղադրվող կամ դատապարտված արական սեռի քաղաքացիների նկատմամբ:
Համաներումը չի տարածվի 2020-ի սեպտեմբերի 27-ին հայտարարված զորահավաքային զորակոչից, ինչպես նաև վարժական հավաքից խուսափած անձանց վրա։
