Քիչ առաջ Եվրոպական խորհրդարանի մեր գործընկերների կողմից տարածվեց մի հայտարարություն և Եվրախորհրդարանի պատգամավոր, ՀՀ հարցով հիմնական զեկուցող Անդրեյ Կովաչևը, Եվրոպական խորհրդարանի պատգամավորներ Ֆրանսուա-Քսավիե Բելամիի, Լուկաս Ֆուրլասի և 119 այլ պատգամավորների հետ միասին նախաձեռնել են և դիմել Եվրոպական հանձնաժողովի նախագահին և Եվրոպական խորհրդի նախագահին՝ հարկադրելու Ադրբեջանին ազատ արձակել այնտեղ պահվող հայ ռազմագերիներին: Այս մասին ԱԺ հայտարարությունների ժամին ասաց «Իմ քայլը» խմբակցության պատգամավոր Արման Եղոյանը:
«Պատգամավորները նշել են՝ խոսքը այն 72 անձանց մասին է, ում գերեվարման փաստը Ադրբեջանն ընդունում է, ինչպես նաև այն 112 անձանց մասին, ում վերաբերյալ Ադրբեջանը չի տրամադրում որևէ տեղեկություն և այն 61 անձանց մասին, ում գերեվարման հարցը, թեև Ադրբեջանը հերքում է, սակայն նրանց մասին առկա են հակառակն ապացուցող փաստեր, պատգամավորները նաև ընդգծում են՝ թեև Ադրբեջանը ռազմագերիների մի մասին փորձում է ներկայացնել որպես ահաբեկիչներ, որոնք իբր թե խախտել են հրադադարի ռեժիմը այն հայտարարվելուց շաբաթներ անց, սակայն սա ապացուցող որևէ փաստ դեռ չի ներկայացվել, սա Եվրախորհրդարանական պատգամավորներն են գրում եվրոպական ինստիտուտների ղեկավարներին»,- ասաց Արման Եղոյանը:
