«Ես փնտրում եմ այնպիսի մեկին, ով դիմացս կկանգնի ու կմեղադրի ինձ»: Այսօր ԱԺ-ում լրագրողների հետ զրույցում ասաց ՀՀ գլխավոր դատախազ Արթուր Դավթյանը՝ անդրադառնալով այն դիտարկմանը, որ իրեն մեղադրում են Մարտի 1-ի գործը տապալելու մեջ:
Հարցին՝ Մարտի 1-ի գործը բացահայտվա՞ծ է, թե՞ ոչ, դատախազը նշեց, որ կա ՍԴ և առաջին ատյանի դատարանի որոշում, որը դատախազությունը վիճարկել է Վերաքննիչ դատարանում. «Հիմնավորումների մասին մենք բազմիցս խոսել ենք: Այդ գործի մեր պատկերացրած իրավական հեռանկարի հարցով մենք նաև նախաձեռնել ենք դիմում ՍԴ-ին: Եթե մեզ հաջողվում է հասնել մեր դիմումի բավարարմանը, մենք հնարավորություն ենք ստանում այդ գործով ամբաստանյալների արարքները վերավորակելու և, ըստ էության, գործի քննությունը շարունակելու: Իսկ եթե մեր դիմումը չի բավարարվում, ապա մենք իմ ասած իրավական ճանապարհով չենք կարողանալու գնալ»: