Վարչապետ Նիկոլ Փաշինյանը երկօրյա այցով մեկնել է Կազան, որտեղ տեղի է ունենալու ԵԱՏՄ վարչապետների հավաքը: Մինչ այդ, Փաշինյանը Կազանում հանդիպել է ՌԴ վարչապետ Միխայիլ Միշուստինի հետ: Հանդիպման ընթացքում քննարկվել են երկկողմ, ինչպես նաև ռեգիոնալ տնտեսական հարցեր, մասնավորապես ենթակառուցվածքների ապաշրջափակման օրակարգի առնչությամբ: Առանձնակի ուշադրության է արժանի սակայն հանդիպման մեկնարկին մի դրվագ: Միխայիլ Միշուստինը Նիկոլ Փաշինյանի հետ հանդիպման մեկնարկին ասել է, որ նրան է փոխանցում ՌԴ նախագահ Պուտինի ողջույնն ու բարեմաղթանքը: Այդ դրվագը բավականին խոսուն է և բազմիմաստ: Միշուստինը մի կողմից այդպիսով ընդգծել է Նիկոլ Փաշինյանի հանդեպ Մոսկվայի այսպես ասած բարձր տրամադրվածությունը: Մյուս կողմից, այդ դրվագը կարող է վկայել այն մասին, որ Միշուստինը Փաշինյանի հետ հանդիպմանը ոչ միայն ներկայանում է որպես ՌԴ վարչապետ, այլ թերևս օրակարգի որոշակի հարցերով էլ ՌԴ նախագահ Պուտինի և Փաշինյանի միջև միջնորդ:
Պետք չէ բացառել և այն, որ Միշուստինի հետ հանդիպմանը Նիկոլ Փաշինյանը քննարկում է հարցեր, որոնք մինչ այդ քննարկել էր ապրիլի 24-ին ՌԴ նախագահ Պուտինի հետ տեղի ունեցած հեռախոսազրույցի ընթացքում, որից հետո Միշուստինի հետ հանդիպումը ունի քննարկված հարցերի շուրջ առարկայական կոնկրետության նպատակ: Ապրիլի 24-ին ՌԴ նախագահի հետ զրույցը իր հերթին տեղի էր ունեցել բավականին դինամիկ և հատկանշական ֆոնին, երբ գործնականում ամբողջ աշխարհի ուշադրությունը կլանել էր Վաշինգտոնը՝ Ջո Բայդենի ուղերձով և հայերի ցեղասպանության ճանաչման պատմական փաստով:
Ի դեպ, դրան հաջորդեց ապրիլի 25-ին Ֆրանսիայի նախագահ Մակրոնի և Պուտինի միջև հեռախոսազրույցը, որի առնչությամբ տեղեկություն տարածվեց, որ կողմերը պայմանավորվել են Արցախի հարցում առաջիկայում հայտարարել համատեղ նախաձեռնությունների մասին: Դրանից հետո էլ եղան Հայաստանում ԱՄՆ դեսպանի հայտարարությունները այն մասին, որ Արցախի հարցում պետք է լուծվի կարգավիճակի և տեղահանվածների վերադարձի հարցը: ԱՄՆ դեսպանը խոսել էր նաև Հայաստանին սպառազինություն մատակարարելու հարցի կարևորության մասին, նշելով իհարկե, որ այստեղ որոշակի խոչընդոտներ կան Հայաստանի ՀԱՊԿ անդամության մասով: Այդպիսով, ակնառու է, որ անցնող օրերին՝ հայերի ցեղասպանության ճանաչման Վաշինգտոնի որոշումից հետո ծավալվել են բավականին բուռն քննարկումներ, որոնց շարքում է թերևս Փաշինյան-Միշուստին հանդիպումը՝ Պուտինի հատուկ ողջույնով: Ակնառու է, որ հայկական օրակարգի շուրջ ծավալվում է քննարկումների և դիվանագիտական-քաղաքական շարժերի որոշակի աշխույժ պահ: Կկարողանա՞ Հայաստանն օգտագործել այն:
