«Հակապետական և հակամարդկային գործունություն ծավալած անձը, ում ձեռքերը թաթախված են սեփական ժողովրդի արյան մեջ՝ խորհրդարանի գլխատման մեջ, չի կարող և իրավունք չունի որևէ հավակնություն ունենալու վերադառնալ քաղաքական դաշտ։ Նա պետք է պատասխան տա իր գործած մեղքերի համար։ Ավելին՝ տնտեսությունը ավիրելու համար»,-«Առաջին լրատվական»-ի հետ զրույցում ասաց տնտեսագետ, «Տնտեսական իրավունքի կենտրոն» ՀԿ նախագահ Մովսես Արիստակեսյանը՝ հակադարձելով ՀՀ երկրորդ նախագահ Ռոբերտ Քոչարյանին։
Հիշեցնենք, որ Ռոբերտ Քոչարյանը նախօրեին իր աջակիցների հետ հանդիպմանը հայտարարել է, որ հնարավորություն կա Հայաստանը մեծ շինհրապարակի վերածելու, բոլորի համար աշխատատեղ ստեղծելու։ «Ուղղակի պետք է աշխատել, լինել կարգապահ, պատասխանատվություն ստանձնել, հաստատուն քայլերով շարժվել՝ Հայաստանի վերականգնման ուղղությամբ»,- ասել է Քոչարյանը՝ հավելելով, որ ով չի ուզում աշխատել՝ թող իրեն չընտրի, ձայն չտա։
«Պետական պաշտոնյա լինելու հանգամանքով միլիարդատեր դարձած, ազգային հարստությունը կողոպտած և երկրի ռազմավարական օբյեկտները մեր ոխերիմ դաշնակցին նվիրած մարդը, երբ խոսում է և հիշում է իր իշխանավարության տարիների շինարարական բումի մասին, զավեշտալի է։ Նա իր կողմից իրականացվող կողոպուտն առարկայացնում էր շինարարական բիզնեսի մեջ, այսօր երկրի կենտրոնը դրա արդյունքում դարձել է բետոնապատ մի ամայի վայր, որտեղ շնչել ու շարժվել հնարավոր չէ։ Բայց Քոչարյանը դա իրականացնում էր իր կողոպտած փողերը անշարժ գույք դարձնելու համար, որպեսզի կարողանար ապահովել իր և ընտանիքի, գերդաստանի ապահով կյանքը ապագայում։ Իր ժամանակ որևէ տնտեսական հրաշք չի եղել։ Նա օգտվել է նախորդ իշխանության ժամանակ սկսված բարեփոխումների արդյունքներից, որոնք հետագայում թվանկարչության արդյունքում դարձան վագրային թռիչքներ»,-ասաց Արիստակեսյանը։
Տնտեսագետի խոսքով՝ եթե Քոչարյանի մտահորիզոնն ուղղորդվում է իր նախընթաց գործունեության շինարարությամբ, երկիրը շինհրապարակ դարձնելու հեռանկարը, ապա նրան պետք է հուշել, որ պետությունը շինհրապարակի կարիք չունի։ Պետությունն ունի տնտեսության զարգացման, տնտեսության կարևորագույն ճյուղերի զարգացման կարիք։ Շինհրապարակը չէ, որ տնտեսությունը զարգացնելու է.« Այն շինարարական փուչիկը, որի մասին խոսել են բոլոր մասնագետները, այդ թվում Քոչարյանի ժամանակաշրջանի մասնագետները, փաստել են, որ ոչ արդյունավետ ծախսեր են կատարվել և դրանով փորձ է արվել ցույց տալ, որ տնտեսությունը զարգանում է։ Բայց եթե շինարարության բումը կայուն տնտեսական աճ ապահովեր, ապա դրան հաջորդած ֆինանսական ճգնաժամը նման հարված պետության տնտեսությանը չէր հասցնի։ Եթե երկիրը ունենար ամուր տնտեսություն և տնտեսության զարգացման իր կայուն հետագիծը, ուղին, ապա այդ ճգնաժամը նման հետևանքներ չէր ունենա, իսկ եթե Քոչարյանը հպարտանում է իր բանկերով, իր մենաշնորհային բիզնեսներով, ապա դա էլի ապացույց չէ այն բանի, որ նա կարող է երկիրը տնտեսապես ոտքի կանգնեցնել»,-ընդգծեց տնտեսագետը։
Արիստակեսյանի խոսքով՝ Քոչարյանի բոլոր խոստումները, բերած փաստարկները, խոստացած փոփոխութունները, լավ հեռանկարը բացառապես նախընտրական PR են, ոչ ավելին. «Նա կարող է խոստումներ տալ, ոսկի սարեր խոստանալ, ինչ որ բաներ հիշել իր կառավարման տարիներից, բայց ժողովրդի հիշողության մեջ Քոչարյանի պաշտոնավարման տարիները մնացել են որպես արյունոտ և դառը տարիներ»,-եզրափակեց տնտեսագետը։
