Ռուսական Regnum գործակալության փոխանցմամբ՝ վրացի ռազմական փորձագետ, «Արսենալի» ռազմա-վերլուծական պարբերականի գլխավոր խմբագիր Իրակլի Ալադաշվիլին հայտարարել է, որ 2008 թվականի օգոստոսյան պատերազմից երեք տարի անց ավելի ակնհայտ է դառնում, որ օգոստոսյան պատերազմը երկու կողմի լուրջ սխալն էր.
«Թեև ներկայումս, կարծես թե, նշվում է, որ Ռուսաստանը հասել է իր առջև դրված նպատակներին և իր օգտին է լուծել Աբխազիայի ու Հարավային Օսիայի սառեցված հակամարտությունների խնդիրը՝ ճանաչելով նրանց անկախությունը, սակայն միևնույն ժամանակ նա միջազգային արենայում կտրուկ վատթարացրել է իր դիրքերը։
Հնգօրյա պատերազմից հետո Ռուսաստանը որոշակի եզրակացություններ է կատարել և սկսել է բարեփոխումներ անցկացնել իր զինված ուժերում։ Այլ հարց է, թե ինչպես է նա իրականացնում այդ բարեփոխումները։ Եզրակացություններ կատարել է նաև Վրաստանը, և վրացական բանակում նույնպես սկսվել է բարեփոխումների անցկացումը։ Սակայն փորձագետների ու հանրության համար շատ դժվար է այդ գործընթացի ընթացքի մեկնաբանումը, քանի որ բանակը նրանց համար փակ ոլորտ է։
Պատերազմի արդյունքում Վրաստանը կորցրեց իր տարածքի 20 տոկոսի նկատմամբ վերահսկողությունը։ Բացի այդ, 1990-ական թվականնների հարկադիր վերաբնակների թվաքանակն ավելացավ տասնյակ հազարավոր նոր փախստականներով։
Իսկ Ռուսաստանն օգոստոսյան պատերազմի արդյունքում ձեռք բերեց երկու նոր ռազմա-քաղաքական հենակետեր, որոնց նա կարող է գործածել ոչ միայն Վրաստանում, այլև ողջ տարածաշրջանում սեփական ազդեցության հաստատման համար։ Օրինակ, Լեռնային Ղարաբաղում նոր պատերազմ հրահրելու և իրադարձությունների ընթացքն իր կողմ թեքելու համար Ռուսաստանը լիովին կարող է օգտվել Ցխինվալի շրջանում տեղակայված իր 4-րդ բազայից։
Իսկ զենիթա-հրթիռային համալիրներով համալրված ու Աբխազիայում (Սև ծովի ափին) տեղակայված 7-րդ բազան կարող է գործածվել Սև ծովի արևելյան ափում Ռուսաստանի ազդեցության ընդլայնման համար։ Սա պետք է հաշվի առնի ոչ միայն Վրաստանը, այլև՝ Թուրքիան, Բուլղարիան ու Ռումինիան»։
Հիշեցնենք, որ հունիսի վերջին Ադրբեջանական Vesti.az կայքին տված հարցազրույցում Իրակլի Ալադաշվիլին հայտարարել էր. «Ես վստահ եմ, որ Հայաստանի ու Ադրբեջանի միջև պատերազմի վերսկսման դեպքում այն չի տևի մի քանի օրից ավելի։ Միջազգային կազմակերպություններն ու այնպիսի երկրները, ինչպիսիք են Ռուսաստանը, ԱՄՆ-ը և Թուրքիան, մեծ ճնշում կգործադրեն հակամարտող կողմերի վրա։
Միևնույն ժամանակ, այդ կարճատև ժամանակահատվածում կողմերը կփորձեն առավելագույնս առաջ տանել իրենց դիրքերը։ Ես՝ որպես ռազմական լրագրող, կարող եմ ասել, որ պատերազմից ավելի վատ բան գոյություն չունի։ Գլխավորը պատերազմից խուսափելն է՝ ելնելով 2008 թվականի մեր պատերազմական փորձից»։