Միացյալ Նահանգների նախագահ Ջո Բայդենը կոչ է արել նվազեցնել լարվածությունը ռուս-ամերիկյան հարաբերություններում: Այս մասին նա հայտարարել է Ռուսաստանին վերաբերող հարցերի շուրջ իր ելույթի ժամանակ: Հեռարձակումը վարում է Սպիտակ տունը:
«Հիմա դեէսկալացիայի ժամանակն է [ԱՄՆ-Ռուսաստան հարաբերություններում]: Առաջընթացի ճանապարհը մտածված երկխոսության և դիվանագիտական գործընթացի միջոցով է: Միացյալ Նահանգները պատրաստ է կառուցողականորեն շարժվել այս գործընթացի ուղղությամբ: Իմ հիմնական միտքն այն է, որ Միացյալ Նահանգների շահերից է բխում Ռուսաստանի հետ աշխատելը, մենք պետք է և մենք կհամագործակցենք», – նշել է ամերիկացի առաջնորդը:
Միաժամանակ, Բայդենը հավելել է, որ եթե Ռուսաստանի գործողություններն ուղղված լինեն ԱՄՆ-ի շահերի դեմ, ապա ամերիկյան կողմը «կպատասխանի»:
Ապրիլի 13-ին Ռուսաստանի նախագահ Վլադիմիր Պուտինը և ԱՄՆ նախագահ Ջո Բայդենը հեռախոսազրույց էին ունեցել: Պետությունների ղեկավարները քննարկել են տարածաշրջանային և գլոբալ մի շարք հարցեր, այդ թվում`երկրների ռազմավարական կայունության շուրջ երկխոսությունը շարունակելու ցանկությունը:
Բանակցությունների ընթացքում Բայդենը առաջարկել է իր ռուս գործընկերոջը հանդիպում անցկացնել չեզոք երկրում:
Ապրիլի 15-ին Բայդենը հրամանագիր է ստորագրել Ռուսաստանի դեմ պատժամիջոցներ սահմանելու մասին: Պատժամիջոցները սահմանվել են 16 կազմակերպությունների և 16 ֆիզիկական անձանց նկատմամբ, որոնք իբր կապված են Ռուսաստանի Դաշնության միջամտության հետ ամերիկյան ընտրություններին: ԱՄՆ-ն արտաքսում է նաև 10 ռուս դիվանագետների:
