Այսօր՝ փետրվարի 9-ին, ԱԺ-ում մեկնարկել է հերթական նիստի աշխատանքը: Այժմ քննարկվում է Վճռաբեկ դատարանի նախագահի ընտրության հարցը: ԲԴԽ-ն առաջադրել է Լիլիթ Թադևոսյանի թեկնածությունը:
Անկախ պատգամավոր Արման Բաբաջանյանը հեգնանքով նշեց, որ թեկնածուի զեկույցը լավն էր. «Տպավորություն ստացա, որ մենք շարունակում ենք նույն ավանդույթները. այս քննարկումներն ավելի դասախոսության են նման, դուք էլ գալիս եք ԱԺ պատգամավորներին որպես ուսանող դիտարկելով»:
Պատգամավորն ընդգծեց. «Ունենք մի իրավիճակ, երբ ամբողջությամբ դատական համակարգը վրեժ է լուծում Հայաստանի պետականությունից, ՀՀ քաղաքացուց, և դատական համակարգը վերածվել է քաղաքական շահերով միավորված խմբի, եթե չասեմ` կուսակցության, որի նպատակն է ամեն գնով վերացնել ՀՀ պետականությունը: Գնահատեք դատական իշխանության վերջին ամիսների վարքը, ու ամենևին էական չէ, թե դատական իշխանությունը ինչպես է վերաբերվում ձեր չսիրած Նիկոլ Փաշինյանին կամ սիրած Ռոբերտ Քոչարյանին ու Սերժ Սարգսյանին. այստեղ պետության հարցն է»:
Պատգամավորը անդրադարձավ ԲԴԽ նախագահի 2020թ. նոյեմբերի 15-ի խայտառակ քաղաքական հայտարարությանը. «Համակարծի՞ք եք եղել այդ հայտարարությանը, եթե ոչ` ինչպե՞ս հասկանալ, որո՞նք էին ձեր լռության պատճառները»:
Արման Բաբաջանյանը նշեց, որ պետությունը նախկինում զավթվել է դատական իշխանության մասնակցությամբ, և հետաքրքրվեց. «Դուք տևական ժամանակ եղել եք դատական համակարգում: Գագիկ Ջհանգիրյանը այդ տարիները նկարագրեց որպես «աղվանական արդարադատություն». Ձեր գնահատականը այդ բնորոշմանը: 2018-ից հետո անձամբ դուք ի՞նչ եք արել, որ դատական համակարգը դառնա ավելի առողջ:»:
Մանրամասն՝ տեսանյութում:
