«Առաջին լրատվական»-ի հարցերին պատասխանել է Արցախի ԱԺ պաշտպանության, անվտանգության և օրինապահության հարցերի մշտական հանձնաժողովի նախագահ, «Միասնական հայրենիք» խմբակցության պատգամավոր Սեյրան Հայրապետյանը:
– Պարոն Հայրապետյան, երեկվա նիստի օրակարգում 2021 թվականի բյուջեի նախագիծն էր, որը, ըստ մամուլի, բուռն քննադատության է արժանացել ընդդիմադիրների կողմից, քանի որ, որտեղ որևէ կերպ չի երևում, որ գործ ունենք հետպատերազմական խնդիրներով լեցուն Արցախի ֆինանսական փաստաթղթի հետ, որևէ ծախս չի կրճատվել, խնայողություն չի արվել: Ինչպե՞ս է քվեարկելու ձեր ֆրակցիան:
– Նիստի ժամանակ ֆինանսների նախարարն իր զեկույցում ասաց, որ հաշվի են առնվել նաև կորոնավիրուսի հետևանքով հասցված վնասները, ինչպես նաև պատերազմի արհավիրքը, որ եկել էր մեր գլխին: Ամեն ինչ հաշվի է առնված: Ճիշտ է, բյուջեն կազմված է մի քիչ շտապողական, բայց բոլոր առաջարկությունները հնարավորինս ներկայացված են: Ինձ թվում է՝ անելու ենք առավելագույնը հանուն ժողովրդի բարեկեցության, քանի որ գիտեք, որ ամեն ինչ շատ բարդ է: Բազմաթիվ հարցեր կան, որոնց պատասխաններն ակնկալում ենք ստանալ: Արցախի Ազգային ժողովում 2021 թվականի բյուջեն կքվեարկվի փետրվարի 11-ին: Ինչ վերաբերում է մեզ, «Միասնական հայրենիք» խմբակցությունը դեռ չի որոշել՝ ինչպես քվեարկել, քանի որ ներկայացրել է առաջարկություններ և սպասում է դրանց ընդունմանը:
– Ինչպե՞ս եք գնահատում, որ Արցախի նախագահի աշխատակազմի տրվող բյուջեն 200 մլն դրամով աճել է՝ հասնելով 800 մլն-ի:
– Բյուջեի նախագիծը գաղտնի չէ, որտեղ ամեն բան պարզ գրված է: Այս պահին ձեռքիս տակ չի, որ ես կոնկրետ թվերով խոսեմ:
– Խոսակցություններ են շրջանառվում, որ Արցախի պաշտպանության բանակը կազմաքանդվում է: Որքանո՞վ են դրանք իրական:
– Փակագծեր չենք բացելու, բայց հայ զինվորը պաշտպանելու է իր հայրենիքի սահմանները: Մենք ոչ մի գործոն չենք բացառում, խաղաղապահների գործոնը շատ կարևոր է, շնորհակալություն ենք հայտնում նրանց՝ գեներալ Մուրադովի գլխավորությամբ, բայց նորից ասում եմ՝ մեր զինվորը միանշանակ պաշտպանելու է մեր հայրենիքի սահմանները: Մենք նորից պետք է բարձրացնենք մեր բանակի, մեր զինվորի դերը՝ մեր հոգատար վերաբերմունքով, ճիշտ օրենքներով, ճիշտ պահվածքով, ոչ թե հենց այնպես խոսելով, պոպուլիստական հայտարարություններ անելով, հարցեր տալով, որի պատասխաններից կարող են օգտվել նաև մեզ բարին չցանկացող մարդիկ:
– Արցախում ՀՅԴ կառույցի ղեկավար Դավիթ Իշխանյանը հայտարարել է, որ պետք է Արցախի նախագահ Արայիկ Հարությունյանը կտրվի Նիկոլ Փաշինյանից, ՀՀ իշխանություններից, ցույց տա իր սուվերենությունը: Ինչպիսի՞ն է ձեր տեսակետն այս հարցում և, որպես ընդդիմադիր ուժ, ինչպիսի՞ն են ձեր հարաբերությունները իշխող կուսակցության և նախագահականի հետ:
– Ես չեմ ուզում մեկնաբանել Դավիթ Իշխանյանի հայտարարությունները: Եթե ինչ-որ բան իր ասածներից կիսատ է ասվել կամ անհասկանալի է, կխնդրեի իր հետ պարզել: Մեր խմբակցության կարծիքը բազմիցս հնչել է խմբակցության ղեկավարի կողմից, կուսակցության նախագահի տեսակետները ևս արտահայտվում են: Այս պահին, եթե որևէ հայտարարություն ունենանք, մոտ ժամանակներս կհնչեցնենք: Իսկ այս պահին մենք աշխատում ենք այս իրավիճակից դուրս գալու ուղղությամբ:
– Իսկ այդ հարցում համագործակցություն կա՞ իշխանությունների հետ:
– Թե ով է այս պահին իշխանության, ով ինչ պաշտոն ունի, դա ինձ համար հիմա էական չէ, էական է, որ ճիշտ աշխատվի, ոչ մի սխալ թույլ չտրվի, քանի որ ցանկացած սխալ կարող է ճակատագրական լինել:
– Քաշաթաղում մի քանի գյուղեր կան՝ Սոսին, Աղավնոն, որ մինչև հիմա հստակ չեն ասում՝ մե՞րն է, թե՞ մերը չի: Դուք՝ որպես պաշտոնյա, փորձե՞լ եք հասկանալ, այնտեղի բնակիչները կարո՞ղ են գնալ իրենց տները, թե՞ ոչ:
– Մեր որոշ քաղաքական գործիչներ կամ սոցիալական ցանցերի օգտատերեր հայտարարություններ են անում, ինչ-որ սահմանագծեր են նշում, քանակներ են նշում, որը խանգարում է մեր անվտանգության համակարգին: Կան կոնկրետ բազմաթիվ խնդիրներ, որոնց մասին այս պահին բարձրաձայնելը միանշանակ ճիշտ չէ: Մենք տիրապետում ենք ձեր նշած իրավիճակին, կան չլուծված շատ ու շատ հարցեր, որոնք առաջացել են այս ֆորսմաժորային իրավիճակի հետևանքով: Դրա համար ես կխնդրեի, որ այն ամենը, ինչը կարող է ինչ-որ չափով վնասել մեր անվտանգային համակարգին, չբարձրաձայնել, քննարկումները կատարել փակ նիստերում կամ համապատասխան հանձնաժողովներում:
