Microsoft- ի հիմնադիր Բիլ Գեյթսը հերքել է համաճարակին իր ենթադրյալ մասնակցության մասին հրապարակումները՝ նշելով, որ պատվաստումների վերաբերյալ կեղծիքների տարածումը կարող է երկարացնել կորոնավիրուսի համավարակը:
«Սա մեծ մարտահրավեր է, երբ մարդիկ պարզ լուծումներ են փնտրում: Նրանք մտածում են, թե արդյոք ինչ-որ մեկը կանգնած չէ՞ համաճարակի հետևում», – ասել է նա գերմանական Suddeutsche Zeitung թերթին տված հարցազրույցում:
Գործարարը նշել է, որ իր հիմնադրամն արդեն բախվել է պատվաստանյութի նկատմամբ մարդկանց անվստահությանը:
«Պոլիոմիելիտի դեմ պայքարի ժամանակ այնպիսի երկրներում, ինչպիսիք են օրինակ Պակիստանը կամ Նիգերիան, լուրեր էին պտտվում, որ պատվաստանյութը վտանգավոր է և կանանց մոտ անպտղություն է առաջացնում», – հավելել է Գեյթսը:
Նա կարծում է, որ նման մոլորությունների դեմ պայքարելու համար արժե դիմել մեծ հեղինակություն ունեցող ազդեցիկ մարդկանց, հասարակության ներկայացուցիչներին կամ կրոնական առաջնորդներին: Նրա կարծիքով՝ միայն նրանք են կարողանում բնակչությանը բացատրել պատվաստանյութի առավելությունները:
