ԱՄՆ Հետաքննությունների դաշնային բյուրոյի (ՀԴԲ) աշխատակիցները լրացուցիչ ստուգումներ են անցկացնում ամերիկյան ազգային գվարդիայի մարտիկների շրջանում՝ պարզելու, թե արդյո՞ք նրանցից ոմանք կարող են սպառնալիք ներկայացնել հունվարի 20-ին կայանալիք ԱՄՆ նորընտիր նախագահ Ջո Բայդենի երդմնակալությանը: Այս մասին հաղորդել է Associated Press-ը՝ ԱՄՆ պաշտպանության նախարարության աղբյուրներին հղումով:
AP-ն նշում է, որ ԱՄՆ ցամաքային զորքերի նախարար Ռայան Մաքքարթին ավելի վաղ ստորաբաժանումների ղեկավարներին, որոնք ծառայելու են երդմնակալության ընթացքում, հանձնարարել է անձնակազմի լրացուցիչ ստուգումներ անցկացնել: «Մենք այս գործողության մեջ ներգրավված անձանց կրկնակի, եռակի ստուգումներ ենք անցկացնում»,- ասել է նա գործակալությանը: Հրամանատարի խոսքով, մինչ օրս Ազգային գվարդիայի մարտիկների կողմից որևէ սպառնալիք չի հայտնաբերվել: