Մոսկվայում Պուտին-Փաշինյան-Ալիև ձևաչափով հանդիպումը հայկական կողմի համար փաստորեն չլուծեց գլխավոր հարցը՝ ռազմագերիների վերադարձը և անհետ կորածների լիարժեք որոնողական աշխատանքի իրականացումը: Դա մի կողմից նշանակում է, որ հանդիպման ընթացքում Ալիևը դրել է պայմաններ, որոնք արժանացել են Փաշինյանի մերժմանը, ինչի հետևանքով էլ գերիների հարցում Բաքվի ղեկավարը շարունակել է մնալ իր մերժողական դիրքում, մյուս կողմից նշանակում է, որ Հայաստանի վարչապետին չի հաջողվել լուծել Հայաստանի համար օրակարգային իր իսկ հռչակած առաջնահերթությունը: Թեմայի շուրջ «Առաջին լրատվական»-ը զրուցել է Հանրային խորհրդի նախագահ, քաղաքագետ Ստյոպա Սաֆարյանի հետ:
«Այս հանդիպումները պետք է դիտարկել սեպտեմբերի 27-ին տեղի ունեցած պատերազմի շարունակության համատեքստում,- նշեց Ս. Սաֆարյանը: Նրա դիտարկմամբ՝ այս հանդիպումը առաջին հերթին որոշ անորոշություններ կրճատել է. «Անհայտ էր, թե ինչ խնդիրներ կարող ենք քննարկել Ադրբեջանի հետ, ինչ ձևաչափով, Մինսկի խմբի ձևաչափը լինելու է, թե ոչ: Այժմ նկատելի է, որ ՌԴ-ն հասկանում է, որ առանց Մինսկի խմբի չի կարող խաղալ: Այդ խմբի ներքո Ռուսաստանն ուզում է էքսկլյուզիվ խաղալ և չի ցանկանում, որ Մինսկի խմբի մյուս համանախագահները գործեն իրեն հավասար ակտիվությամբ: Ռուսաստանն այսօր հրապարակավ հավաստիացումներ է տվել, որ չի շեղվում Մինսկի խմբի սկզբունքներից… Հետագայում պարզ կլինի, թե արդյոք ՌԴ-ն իսկապես չի շեղվելու Մինսկի խմբի սկզբունքներից: Թերևս նկատելի է, որ Ռուսաստանն աստիճանաբար վերադառնում է Մինսկի խմբի ձևաչափ»:
«Եռակողմ հայտարարությունից հետո ԱՄՆ-ը և Ֆրանսիան բացատրություններ են պահանջել ՌԴ-ից հրադադարի պայմանների շուրջ՝ հասկացնելով, որ այդ հայտարարության մեջ ամեն ինչ չէ, որ հրադադարի մասին է:
Նկատելի է, որ Մոսկվան շտապում է իրականություն դարձնել նոյեմբերի 9-ի հայտարարությամբ ձեռք բերված պայմանավորածությունները, այդ թվում նաև հաղորդակցության ուղիների, ճանապարհների ապաշրջափակման հարցը, որպեսզի դրանք անշրջելի դառնան: Այս հարցերն են հետաքրքրում բոլորին՝ բացի գերիների խնդրից: Չեմ կարծում, թե գերիների և փախստականների հարցերը չեն քննարկվում, մենք չգիտենք, թե Փաշինյանը և Պուտինը ինչ են պայմանավորվել, դեռևս ունենք ինֆորմացիայի պակաս: Բայց ակնհայտ է, որ բացառապես Ռուսաստանն է թելադրել օրակարգը, դա երևում է այսօրվա եռակողմ, չորս կետանոց հայտարարությունից՝ տարածաշրջանի ճանապարհների ապաշրջափակման վերաբերյալ:
Չեմ կարծում, թե այդ ճանապարհների ապաշրջափակման շահառուն Ադրբեջանն է, դա բացահայտ ռուսական օրակարգ է»,- նշեց Սաֆարյանը՝ հիշեցնելով, որ 2008-ից մշակված ռուսական այս պլանը, որը նախատեսում էր 7 շրջանների վերադարձ և ռուս խաղաղապահների տեղակայում, մերձկրեմլյան աղբյուրների կողմից անվանվել էր «տարածքներ ապաշրջափակման դիմաց», և դեռևս 2016թ. ապրիլյան պատերազմից հետո, երբ Լավրովը ժամանեց Հայաստան, լավրովյան պլանի մասին արտահոսք եղավ, հստակ նկարագրվեց, որ անվանումը հենց դա էր՝ «տարածքներ՝ ապաշրջափակման դիմաց»:
Մանրամասն՝ տեսանյութում:
