Բելառուսի նախագահ Ալեքսանդր Լուկաշենկոն ասել է, որ Բելառուսի համար ռուսական բնական գազի գինը 2021 թվականին կկազմի 128.5 դոլար՝ հազար խորանարդ մետրի համար: Այս մասին նա հայտարարել է «Ռոսիա 1» հեռուստաալիքի եթերում՝ Նաիլա Ասկեր-զադեի հետ զրույցում, հաղորդում է «ՌԻԱ Նովոստի»-ն:
Ընդ որում, Բելառուսի նախագահը նշել է, որ ավելի արդար գին էր ակնկալում: «Կարծում եմ, որ այս գինը մեր հարաբերությունների պայմաններում կարող էր ավելի արդար լինել»,- ասել է նա:
Միևնույն ժամանակ, Բելառուսի ղեկավարը շեշտել է, որ չի պատրաստվում այդ հարցը քննարկել ՌԴ նախագահ Վլադիմիր Պուտինի հետ:
«Եթե այդպես եք որոշել, թող այդպես էլ լինի»,- ամփոփել է Լուկաշենկոն:
Ավելի վաղ Բելառուսի վարչապետ Ռոման Գոլովչենկոն հայտարարել էր, որ Մոսկվան և Մինսկը պայմանավորվել են 2021 թվականին հանրապետություն գազի և նավթի մատակարարման շուրջ:
