Դեկտեմբերի 26-ին Սերժ Սարգսյանի փեսա, Վատիկանում ՀՀ նախկին դեսպան Միքայել Մինասյանը ֆեյսբուքյան իր էջում հրապարակել է ՀՀ Անվտանգության խորհրդի քարտուղար Արմեն Գրիգորյանին ՀԱՊԿ գլխավոր քարտուղար Ստանիսլավ Զասի կողմից ս.թ. սեպտեմբերի 1-ին ուղղված «գաղտնի» գրության պատճենը:
Անվտանգության խորհուրդը արձագանքել է այդ հրապարակմանը՝ նշելով, որ Մինասյանը ՀԱՊԿ հերթական վարժանքների պլանը ներկայացրել է իբրև սեպտեմբերի 27-ին սկիզբ առած պատերազմական գործողությունների նախազգուշացում՝ դրանից բխող հետևություններով։
Ներկայումս Հայաստանում ներքաղաքական պայքարը ծավալվում է Նիկոլ Փաշինյանի կառավարության դավաճանության և Ռուսաստանի դերի ու պատասխանատվության, պատերազմի ընթացքի, դաշնակիցներին չդիմելու շուրջ։ ՀԱՊԿ գլխավոր քարտուղարի նամակի հրապարակումն էլ, կարելի է ասել՝ հենց այս շարքից է։
Քաղաքագետ Ռուբեն Մեհրաբյանի կարծիքով՝ դատելով մամուլի հրապարակումներից ու դեպքերի ընթացքից, կարող ենք գալ միանշանակ եզրակացության, որ դա աղմուկ է ոչ մի բանի շուրջ։ «Դա եղել է աշխատանքային մի փաստաթուղթ, որը բացարձակապես որևէ կապ չունի այն նշանակության հետ, որը փորձում են այդ թղթաբանությանը հաղորդել»,- «Առաջին լրատվական»-ի հետ զրույցում ասաց նա։
Մեհրաբյանի դիտարկմամբ՝ սա Հայաստանում իրավիճակի ապակայունացման հերթական անհաջող, կացնային փորձն է։
Քաղաքագետ Լևոն Շիրինյանը ևս կարծում է, որ սա Հայաստանի ներքաղաքական կյանքը ապակայունացնելու հերթական միջոցն է։ «Պատերազմից հետո հատկապես սա սաստկացել է՝ ինչ-որ մութ գործարքներ, ՀԱՊԿ-ի նախազգուշացումներ։ Տեսնում են՝ ոչ մի հարց չի լուծվում, նման մի բան լրատվամիջոց են նետում, մի տաս օր քննարկում են ու անցնում է։ Բայց, հա, ժողովուրդը պետք է հիվանդությունից բուժվի՝ հատկապես առաջին դեմքերը։ Հերիք է օտարի թելադրանքով Հայաստանում ստուգումներ անեն, պատերազմի օրերին տեսանք, թե ՀԱՊԿ-ն իրենից ինչ է ներկայացնում»,- «Առաջին լրատվական»-ի հետ զրույցում ասաց նա։
Շարունակելով՝ մեր զրուցակիցն ասաց. «Եթե ուզում եք որևէ ճշգրիտ բան իմանալ, ապա նկատի ունեցեք հետևյալը. Ռուսաստանը ՆԱՏՕ-ի, ԱՄՆ-ի հետ գոտեմարտի մեջ է, դրա համար մերձենում է Թուրքիայի հետ՝ 1920 թվականի օրինակով։ Թուրքիան էլ հայկական հարցի գինն է պահանջում, ինչը Ռուսաստանը սիրով բավարարում է։
Ով ինչպես հասնի, մեր երկիրն օգտագործում է, այսօրվա փրկիչների խումբն էլ, փրկիչ փեսայի միջոցով, սիրով բավարարում է, դադարեցնել է պետք։ Իշխանությունը ճիշտ է, որովհետև ժողովուրդն իր հետ է, ու ոչ մի ՀԱՊԿ իրեն չի փրկի։ Թողեք ժողովուրդն իր վերքերը սկսի բուժել ու ապրել։ Իշխանության փոփոխությո՞ւն են ուզում՝ դեպի հանրաքվե կամ ընտրություններ, մնացածը հեղաշրջում է ու պետական հեղաշրջման ձև, որը քրեորեն պատժելի է»․
Եզրափակելով՝ քաղաքագետը նաև հարց է բարձրացնում՝ ինչպե՞ս է այդ փաստաթուղթը հայտնվել Սերժ Սարգսյանի փեսայի ձեռքերում։
