Ինչպես հաղորդում է ՙՄեդիամաքսը՚, Երևանի բազմաբնակարան շենքերի բնակարանների շուկայական միջին գները, 1 քառ. մ հաշվարկով, 2011 թ. հունիսին, նախորդ տարվա նույն ժամանակահատվածի հետ համեմատ, նվազել են 9.26%-ով՝ կազմելով 256,800 դրամ (686 դոլար):
Վկայակոչելով անշարժ գույքի կադաստրի պետական կոմիտեի տվյալները, 2010 թ. հունիսի համեմատ, բնակարանների գների նվազում արձանագրվել է մայրաքաղաքի բոլոր համայնքներում՝ բացառությամբ Նուբարաշենի, որտեղ ավանդաբար անշարժ գույքի գները ամենաէժանն են Երևանում (148,700 դրամ 1 քառ. մ հաշվարկով, աճը՝ 0.6%):
Կենտրոն համայնքում բնակարանների գները հունիսին նվազել են 7.76%-ով (37,100 դրամով)՝ 1 քառ. մ հաշվարկով կազմելով 441,000 դրամ:
2011 թ. հունիսին, նախորդ տարվա նույն ժամանակաշրջանի համեմատ, Երևանում 6.43%-ով նվազել են նաև բնակելի տների գները՝ 1 քառ. մ հաշվարկով կազմելով 273,400 դրամ:
2011 թ. հունիսին հանրապետությունում անշարժ գույքի նկատմամբ իրականացվել է 16,954 գործարք, որոնց 25.1%-ն օտարման գործարքներ են:
