Չնայած մի քանի ժամ տևած աշխատանքին՝ ՄԱԿ-ի Անվտանգության խորհրդին այդպես էլ չի հաջողվել ընդհանուր դիրքորոշում որդեգրել Սիրիայի հարցով: Այստեղ կրկին տարակարծություններ են առաջացել արևմտյան երկրների և Ռուսաստանի ու Չինաստանի միջև, որոնք դեմ են կոշտ դիրքորոշման որդեգրմանը:
Ինչպես լրագրողներին հայտարարել է ՄԱԿ-ում ՌԴ մշտական ներկայացուցիչ Վիտալի Չուրկինը, տարակարծությունները հետևյալն են. արևմտյան երկրները փորձում են ամեն ինչում մեղադրել Սիրիայի իշխանություններին, մինչդեռ Ռուսաստանը կարծում է, որ իրավիճակն արաբական այդ երկրում շատ ավելի բարդ է, և անհրաժեշտ է ճիշտ եզրակացություններ անել: Այս մասին հաղորդում է ITAR-TASS գործակալությունը:
Բացի այդ, Ռուսաստանը դեմ է ՄԱԿ-ի Անվտանգության խորհրդի կողմից Սիրիայի հարցով բանաձևի ընդունմանը: Ըստ Չուրկինի՝ «հնարավոր է նաև սահմանափակվել արձագանքման ավելի մեղմ տարբերակով»: «Օրինակ՝ ՄԱԿ-ի Անվտանգության խորհրդի նախագահի կողմից հրապարակված պաշտոնական հայտարարությամբ»,- ասել է նա:
