«Հայաստանում իրավիճակը սրվել է, որովհետև Հայաստանը կրել է ծանր պարտություն՝ կարևորագույն և պետականության առանցք հանդիսացող հարցում, կորցրել ենք հազարավոր կյանքեր, տարածքներ, քանդված է պաշտպանական -անվտանգային համակարգը, և մեր պետությունը գործնականում մնացել է մեկ այլ պետության խնամքին: Բնական է, որ այս իրավիճակում պետք է սրվի ներքին կյանքը: Ամբողջ հարցն այն է, որ այդ սրացումները չգնան քաղաքացիական բախումների ճանապարհով, այլ հանգուցալուծվեն ներքին դերակատարների պայմանավորվածութամբ: Այս մասին «Առաջին լրատվական»-ի հետ զրույցում ասաց վերլուծաբան Հակոբ Բադալյանը:
«Բախումներն էլ ավելի են թուլացնելու պետությունը: Ինքնիշխանության այն փշրանքները, որ մնացել են, դրանց վրա պետք է փորձենք կառուցել մեր պետության սուբյեկտայնությունը և ինքնիշխանությունը: Դա պետք է լինի բոլոր ներքին դերակատարների հրամայականը՝ սկսած իշխանությունից մինչև ընդդիմության ամենատարբեր սեգմենտներ»,- նշեց վերլուծաբանը՝ ընդգծելով որ քաղաքացիական բախումների վտանգ կա, և դրա համար պատասխանատու են լինելու բոլորը:
«Հանուն հանրապետության» ԺՊԴԿ անդամ Հայկ Այվազյանը նկատեց, որ ներքաղաքական դերակատարներից ոչ մեկը հասարակության լայն աջակցությունը չի վայելում: «Նեղ անձնական շահերից դրդված գործողություններ են: Այսօրվա ակցիաները ցույց տվեցին, որ այն, ինչ տեղի ունեցավ, քաղաքական խուլիգանություն է»,- նշեց Այվազյանը՝ հավելելով, որ տեղի էր ունենում ոչ թե խաղաղ ակցիա, այլ դա դավադրություն էր հանրային կյանքի նկատմամբ:
Հայկ Այվազյանի դիտարկմամբ՝ իշխանական կողմից իրավիճակը սրողներից է վարչապետը. «Չարություն արած երեխաների պես մեղավորներ են ման գալիս, անհասկանալի վերլուծություններ անում»:
Մանրամասները՝ տեսանյութում:
