Օրերս հայտարարություն էր տարածվել, թե Նիկոլ Փաշինյանի հրաժարականն են պահանջում Սփյուռքի 5 տասնյակից ավելի կառույցներ։ Նշվում էր նաև թեհրանահայ 17 միությունների կողմից պահանջին միանալու մասին։ Հայտարարությունից հետո Թեհրանի Հայկական բարեգործական ընդհանուր միությունը հերքեց այս պահանջին միանալը։ Միության նախագահ Նժդեհ Մութաֆյանը նշել էր. «Պաշտոնապես հայտնում ենք, որով ՀԲԸ միությունն, ըստ միության կանոնագրի, ինչպես նաև կենտրոնանալով իր ապագայի ծրագրերի վրա, հարգելով բոլորի անձնական կարծիքները, հայտնում է իր չեզոք դիրքի մասին՝ շեշտելով, որ միության անունը, թեկուզ և առանց ստորագրության, համացանցում հայտնվել է առանց համադրության»։
Իրանահայ վերլուծաբան Ռաֆիկ Մելիք-Սեթյանը «Առաջին լրատվական»-ի հետ զրույցում նշեց, որ իրանահայերը իրավունք չունեն Հայաստանի վերաբերյալ հայտարարություններ անելու։ «Մենք մեզ իրավասու չենք համարում, որպես իրանահպատակներ, հայտարարություններ անենք Հայաստանի վերաբերյալ, հրաժարականի կամ այլ հարցերով: Դժբախտաբար, մեր շրջանակում թյուրիմացություն է եղել, ինչ-որ ստորագրահավաք եղավ Նիկոլ Փաշինյանի հրաժարականի վերաբերյալ, որին բոլորը չմասնակցեցին, բայց գրվեց իրանահայ կառույցների անունից»,- նշեց Մելիք-Սեթյանը։
Թեհրանի «Արաքս» շաբաթաթերթի գլխավոր խմբագիր Մովսես Քեշիշյանն էլ այն կարծիքին է, որ Դաշնակցությունն իրանահայության անունից իրավունք չունի հայտարարություն տարածելու։ Նրա խոսքերով՝ հայտարարությունը, որ տարածել են կառույցները Նիկոլ Փաշինյանի հրաժարականի պահանջով, իրականության հետ աղերս չունի. «Որ իշխանությունը պետք է հեռանա, դա ոչ ես եմ կիսում, ոչ էլ Սփյուռքի հայությունը: Այստեղ ես չեմ տեսնում միայն պարտված իշխանություն, ես այստեղ տեսնում եմ պարտված հայություն, պարտված երկիր՝ իր զինվորով, իր քաղաքական ուժերով»:
