Ռազմավարական և միջազգային հետազոտությունների վրացական հիմնադրամի տնօրեն Ալեքսանդր Ռոնդելին, «Առաջին լրատվականի» հետ զրույցում մեկնաբանելով The Business Year – Azerbaijan 2011 պարբերականի հատուկ համարին տված Վրաստանի նախագահ Միխեիլ Սաակաշվիլիի հարցազրույցը, նշեց, որ Վրաստանի նախագահի խոսքերը ոչ մի կերպ չեն կարող ուղղված լինել Հայաստանի դեմ:
Հիշեցնենք, որ հարցազրույցում Սաակաշվիլին անդրադարձել է վրաց-ադրբեջանական հարաբերություններին և նշել, որ երկու երկրներն էլ լուրջ խնդիրներ ունեն՝ չլուծված հակամարտությունների հետ կապված. «Ադրբեջանի և Վրաստանի ցանկացած ընդդիմախոս մեր երկու երկրների թշնամին է: Մեր ուժը միասնության մեջ է, և դրանք պարզապես խոսքեր չեն, դա իրողություն է»:
Ռոնդելին նշեց, որ Վրաստանը երբեք որևէ քայլ չի կատարել և չի կատարի Հայաստանի դեմ. «Վրաստանը բացարձակապես չեզոք է հայ-ադրբեջանական հակամարտության հարցում, քանզի թե՛ Հայաստանը, թե՛ Ադրբեջանը մեր հարևաններն են, երկուսն էլ եղբայրական ժողովուրդներ են, և Վրաստանի քաղաքականությունը երբեք ուղղված չի լինելու ի վնաս այդ հարաբերությունների»:
Ռոնդելի գնահատմամբ՝ Սաակաշվիլիի հայտարարությունը կովկասյան սեղանի ավանդույթներից ելնող քայլ էր, և բացառված է, որ Վրաստանի նախագահի այդ հայտարարությունը ուղղված լինի Հայաստանի դեմ. «Երբ մենք ասում ենք, որ լավ հարաբերություններ ունենք, սովորաբար նաև ասում ենք նման քաղցր և հաճելի բառեր»:
