Հոկտեմբերի 27-ի զոհերից՝ Ազգային ժողովի փոխնախագահ Յուրի Բախշյանի այրին՝ Անահիտ Բախշյանը, այլևս թերահավատ է, որ Հոկտեմբերի 27-ի գործը ԱԱԾ վարույթում երբևէ կբացահայտվի։ Նա «Առաջին լրատվական»-ի հետ զրույցում ասաց, որ մարտ ամսից որևէ նորություն չունի գործի քննությունից։ Մինչ այդ էլ առանձնապես ոչնչից տեղյակ չի եղել։ «Երկու անգամ իմ պահանջով քննչական խմբի ղեկավարի հետ հանդիպում է եղել, բայց միայն այդքանը։ Մնացած մանրամասներից տեղեկանում եմ Տարոն Սահակյանի հարցազրույցներից»,- «Առաջին լրատվական»-ի հետ զրույցում ասաց տիկին Բախշյանը։
Հիշեցնենք, որ երկրորդ գումարման ԱԺ պատգամավոր, 2000-2003 թթ. ՌԴ կառավարությունում ՀՀ կառավարության հատուկ ներկայացուցիչ Տարոն Սահակյանը նախօրեին «Առաջին լրատվական»-ի հետ զրույցում ասել էր, որ Ազգային անվտանգության ծառայությունում քննվող Հոկտեմբերի 27-ի գործից անջատված մասով գործով քննությունը վտանգված է, փակուղի է մտել, և պետք է մոռանալ, որ այդ գործը երբևէ կբացահայտվի։ Սահակյանը պնդում էր, որ Հոկտեմբերի 27-ի գործից կարևոր փաստաթղթեր են անհետացել, ինչպես նաև շատ կարևոր հանգամանքների վերաբերյալ իր տված ցուցմունքները հասանելի են դարձել այլ անձանց, ինչը սպառնում է իր անվտանգությանը։
«Հոկտեմբերի 27-ի անջատված մասով կարևոր փաստաթղթեր են անհետացել։ Զուգահեռ՝ հունիս-հուլիս ամիսներին շատ կարևոր ցուցմունք էի տվել, որը, համոզված եմ, այդ պատերի ներսում չի մնացել, և դա շատ վտանգավոր զարգացումներ ունեցավ և կունենա և՛ երկրի, և՛ անձամբ ինձ համար։ Չեմ կարող ասել, թե ով է կազմակերպել այդ արտահոսքը՝ միայն քննչական խմբի ղեկավա՞րը, թե՞ հսկող դատախազը՝ Աղաջանյանը։ Բայց կարևոր փաստաթղթերի կորելը, որով կոծկվում է հետին թվով որոշումներ կայացնելու փաստը, դրա շահագրգիռ կողմը վերահսկող դատախազ Աղաջանյանն է»,- ասաց Սահակյանը։
Անահիտ Բախշյանն ասաց, որ ապշած է Տարոն Սահակյանի ասածներից. «Ուզում եմ հասկանալ՝ ՀՀ ԱԱԾ-ն ում է ծառայում՝ մեր պետությա՞նը, որի հիմքերն օրեցօր խարխլվում են, թե՞ ուրիշին։ Ես շատ վտանգավոր բաներ եմ տեսնում այս ամենի տակ ու շատ մտահոգ եմ»,- ասաց Բախշյանը՝ հավելելով, որ աստիճանաբար գալիս է այն համոզման, որ ԱԱԾ-ն չի բացահայտելու Հոկտեմբերի 27-ի գործը:
«Վերջին ամիսների ողբերգական զարգացումների հետ կապված ես տեսնում եմ միտում, որով փորձ է արվում Հոկտեմբերի 27-ը թաղել շատ խորը։ Չգիտեմ ինչ մտածել ու ինչ ասել այս ամենի վերաբերյալ։ Իմ գլխում չի տեղավորվում, թե ինչպես կարելի է այս աստիճանի չսիրել, չգնահատել պետությունը, պետականությունը և թույլ տալ նման բաներ։ Ակնհայտ է, որ վերջին երկու ամիսների ողբերգությունը Հոկտեմբերի 27-ի ուղիղ շարունակությունն է։ Ես եկել եմ այն համոզման, որ Հոկտեմբերի 27-ը ծրագրվել է մեր թշնամի երկրում՝ Թուրքիայում»,- ասաց Բախշյանը։
Մեր հարցին՝ պատրաստվո՞ւմ է իր փաստաբանի հետ ստեղծված իրավիճակում ինչ-որ քայլեր ձեռնարկել, պահանջներ առաջ քաշել ԱԱԾ-ի առաջ, Բախշյանը պատասխանեց. «Այս պահին չեմ մտածել այդ մասին ու չգիտեմ՝ արդյոք իմաստ ունի՞ նման քայլեր ձեռնարկել։ Այս պահին կարևոր է մեր պետության՝ անդունդ գլորվող թափը կասեցնել։ Երբ դա հաջողվի, երբ հասկանանք՝ ի վերջո ով է այդ ղեկը իր ձեռքը վերցնում, կայունացնում իրավիճակը, նոր կարելի է քայլեր ձեռնարկելու մասին մտածել։ Այս պահին չգիտեմ ինչ կարելի է անել»։
Բախշյանի պաշտպան Զարուհի Մեջլումյանը ևս «Առաջին լրատվական»-ի հետ զրույցում ասաց, որ Հոկտեմբերի 27-ի գործից անջատված մասով գործը կարճումից դուրս բերելը և գործի վերաբացումը բեկումնային էր, աննախադեպ, բայցևայնպես անցած տարվա դեկտեմբերից որևէ քննչական գործողության չեն մասնակցել: «Դա պայմանավորում եմ թերևս համավարակով։ Սա ծանր գործ է, մեկ օրվա գործ չէ անշուշտ, շուրջ 50 հատոր է գործը։ Սա հապճեպ չէր լինելու, մենք չէինք էլ ակնկալում, որ շատ արագ զարգացումներ կլինեն, բայց լավատես եմ, որ համավարակի և պատերազմական գործողությունների ավարտից հետո հետևողական են լինելու, որ գործը առաջ գնա: Պետք է բեկում լինի»,- ասաց փաստաբանը։