Արտարժույթի շուկայում իրավիճակն արդեն կայունանում է, մարդկանց մոտ առկա խուճապային տրամադրությունները՝ ցրվում։ Այսօր արդեն փոխանակման կետերում և rate.am կայքում դոլարի առքը 503-505 դրամ է, իսկ վաճառքը՝ 510-512։ Համեմատության համար նշենք, որ նախօրեին դոլարի վաճառքը հասել էր 521 դրամի։
Հիշեցնենք, որ նախօրեին Կենտրոնական բանկը հայտարարություն տարածեց, որում ասվում էր, որ ֆինանսական շուկաների բնականոն գործունեության ապահովման նպատակով Կենտրոնական բանկը արտարժութային շուկայում կիրականացնի գործառնություններ և անհրաժեշտության դեպքում կկիրառի իր գործիքակազմում առկա բոլոր գործիքները՝ երաշխավորելով գների և ֆինանսական կայունությունը։ Ըստ տեղեկությունների՝ այդ գործողությունների շրջանակում 50 միլիոն դոլարի չափ գումար է «ներարկվել» շուկա, ինչն էլ նպաստել է ներկա կայունացմանը։
Տնտեսագետ, ՄԱՀԻ ասոցացված փորձագետ Ջուլիետա Թադևոսյանը «Առաջին լրատվական»-ի հետ զրույցում ասաց, որ դրամի արժեզրկումը բնական էր, սպասելի էր համավարակով և պատերազմական իրավիճակով պայմանավորված, ինչպես նաև արտաքին տնտեսական գործոններով պայմանավորված։ «Դրամի արժեզրկումը հնարավոր էր և սպասվում էր։ Որոշակի ազդեցություն ունեցան նաև մարդկանց մտավախությունները, անհանգստությունները և որոշակի խուճապային տրամադրությունները, բայց կարծում եմ, որ իրավիճակն այնպիսին չէ, որ բնակչությունը խուճապի մատնվի և խուճապային վարք դրսևորի, քանի որ համապատասխան մարմինները՝ Կենտրոնական բանկն ունի զգալի պահուստներ և ի վիճակի է այդ հարցը կարգավորել։ Պարզապես որոշակի ժամանակ է պետք։ Ամեն դեպքում, կարծում եմ, որ այս իրավիճակը, տատանումները ռիսկային են և մոտակա 1-2 ամսվա ընթացքում պետք չի անհանգստանալ։ Հակառակ դեպքում, Կենտրոնական բանկն իր հնարավորություններով քայլեր կձեռնարկի»,-ասաց տնտեսագետը՝ հավելելով, որ արդեն իսկ կայունացում նկատվում է։ Դրան զուգահեռ էլ, Թադևոսյանի խոսքերով, հարկավոր է բնակչության շրջանում իրազեկման աշխատանքներ իրականացնել, բացատրել, որ խուճապի կարիք չկա, ամեն ինչ վերահսկելի է, և ԿԲ-ն ի վիճակի է առաջիկա ամիսներին վալյուտային ներխուժումների միջոցով խնդիրը կարգավորել։
Արտահանողների միության նախագահ Րաֆֆի Մխչյանն էլ «Առաջին լրատվական»-ի հետ զրույցում հույս հայտնեց, որ առաջիկա օրերին դրամի արժեզրկումը կկանգնի, վիճակը կկայունանա, քանի որ մենք այս վիճակին ականատես ենք եղել նաև անցած տարիներին։ «Ես կարծում եմ, որ վիճակը կկայունանա։ Համենայնդեպս գիտեք, որ արտահանումը միշտ քիչ է ներմուծումից, իսկ արտահանման համար շատ ավելի բարենպաստ է դոլարի բարձրացումը, ինչը չի կարելի ասել ներմուծման համար։ Բայց, քանի որ մենք մեր զամբյուղն ավելի շատ ներկրված ապրանքներով ենք լցնում, դրա համար ժողովրդի կենսամակարդակի վրա տատանումն իր ազդեցությունը կթողնի»,- ասաց Մխչյանը։
Ինչ վերաբերում է դրամի արժեզրկմանը, մեր զրուցակցի խոսքերով, պատճառները մի քանիսն են՝ կորոնավիրուսի ճգնաժամը, 2020 թվականին տուրիստների հոսքի նվազումը, որի պատճառով դոլարի շրջանառության պակաս եղավ, տրանսֆերտները քչացան կորոնավիրուսի պատճառով։ «Եվ մեկը մյուսի հետ կուտակվելով նպաստեց նրան, որ դոլարը 470-ից հասավ 500։ Իսկ 520-521-ը աժիոտաժային էր, դա լուրջ չէ»,- ասաց Մխչյանը՝ հավելելով, որ առաջիկա օրերին ևս կկայունանա դրամը։ Պարզապես հարկավոր է հավատը չկորցնել մեր երկրի, մեր արժույթի հանդեպ։ «Այս աժիոտաժը հենց դրանով է պայմանավորված, որ մարդիկ մեծ քանակի դոլար են գնում։ Իրենց ավանդները հանում են բանկերից ու դոլար են գնում, բայց եթե մի փոքր կայունություն լիներ երկրում, նման երևույթներ չէին լինի»,-եզրափակեց Արտահանողների միության նախագահը։
Լուսանկարը՝ Armeniasputnik-ի
