Ֆրանսիայի և Գերմանիայի արտաքին գործերի նախարարներ Ժան-Իվ Լե Դրիանն ու Հայկո Մաասը ԱՄՆ-ին կոչ են արել վերադառնալ Իրանի հետ հարաբերություններում համատեղ մոտեցմանը: Նախարարների համատեղ հայտարարությունը հրապարակել է Le Monde թերթը:
«Դա անհրաժեշտ է, որպեսզի երաշխավորենք, որ Իրանի միջուկային ծրագիրը ծառայի միայն խաղաղ նպատակների և պատասխաններ տանք այլ խնդիրների, որոնք այս երկրի քաղաքական կուրսը ստեղծում է մեր անվտանգության համար», – ասված է հայտարարության մեջ:
2015-ին Միացյալ Թագավորությունը, Գերմանիան, Չինաստանը, Ռուսաստանը, ԱՄՆ-ը, Ֆրանսիան և Իրանը համաձայնության եկան Համատեղ գործողությունների համապարփակ ծրագրի շուրջ (ՀԳՀԾ), որը վերացնում է Իրանի դեմ պատժամիջոցները միջուկային ոլորտում՝ Թեհրանի պարտավորությունների դիմաց: Նույն թվականին ՄԱԿ-ի Անվտանգության խորհուրդը ընդունեց 2231 բանաձևը, որով 2020 թվականի հոկտեմբերի 18-ը հայտարարվեց զենքի էմբարգոյի ավարտ:
2018-ին ԱՄՆ նախագահ Դոնալդ Թրամփը դուրս եկավ ՀԳՀԾ- ից և կրկին պատժամիջոցներ կիրառեց Թեհրանի նկատմամբ, ինչը Իրանին դրդեց կրճատել միջուկային պարտավորությունները:
