Թուրքական Doğan լրատվական գործակալության փոխանցմամբ՝ բրիտանացի խորհրդարանականների խումբը խորհրդարան է ներկայացրել մի հաշվետվություն, որում նախազգուշացնում է ԵՄ-ին Թուրքիայի անդամակցության պարագայում ակնկալվող ռիսկերի մասին։
Հաշվետվության մեջ նշված է, որ եթե Թուրքիան անդամակցի ԵՄ-ին, ապա դա վերջինիս համար կստեղծի անվտանգության ռիսկեր, քանի որ ԵՄ-ի հարևանների թվում կհայտնվեն այնպիսի երկրներ, ինչպիսիք են Իրանը, Իրաքը և Սիրիան։ Բացասական գործոնների թվում նշվում են նաև կազմակերպված հանցագործության ու ներգաղթյալների հնարավոր աճը։
Հիշեցնենք, որ 1999 թվականի դեկտեմբերի 10-ին ԵԽ-ի` Հելսինկիում տեղի ունեցած գագաթնաժողովում Թուրքիային շնորհվեց ԵՄ-ին անդամակցելու թեկնածու երկրի կարգավիճակ:
2004 թվականի դեկտեմբերին Բրյուսելում անցկացված ԵԽ համաժողովում միաձայն որոշվեց Թուրքիայի հետ բանակցություններ սկսել 2005 թվականի հոկտեմբերի 3-ին: Այդ օրը ԵՄ անդամ երկրները Լյուքսեմբուրգում երկարատև քննարկումներից հետո ընդունեցին Թուրքիայի հետ բանակցություններ սկսելու որոշում: Այդ ժամանակ Թուրքիայի արտաքին գործերի նախարար (ներկայումս Թուրքիայի 11-րդ նախագահ) Աբդուլլահ Գյուլը հայտարարեց, որ Թուրքիան հասցրեց նստել մեկնող գնացքը։
Ինչ վերաբերում է Մեծ Բրիտանիային, ապա նա մեծապես աջակցում է ԵՄ-ին Թուրքիայի լիիրավ անդամակցությանը: 2010 թվականի հուլիսի 27-ին վարչապետ Դևիդ Քեմերոնն Անկարայում հայտարարեց, թե ԵՄ-ին Թուրքիայի անդամակցելը կնպաստի մուսուլմանական աշխարհի հետ ԵՄ-ի հարաբերությունների բարելավմանը:
Բացի այդ, Քեմերոնը սուր քննադատության ենթարկեց այն երկրներին, որոնք ԵՄ-ին Թուրքիայի անդամակցելու հարցում գիտակցաբար իսլամատյացություն են առաջացնում: Ըստ Քեմերոնի՝ Թուրքիան չափավոր իսլամական երկիր է, և անհրաժեշտ է իսկական իսլամը տարբերել նրա ծայրահեղական դրսևորումներից:
Քեմերոնը նաև ընդգծել էր Թուրքիայի՝ որպես ՆԱՏՕ-ի անդամի դերը. «Երբ ես պատկերացնում եմ, թե Թուրքիան՝ որպես ՆԱՏՕ-ի անդամ, որքան շատ բան է արել Եվրոպայի պաշտպանության համար, և այն, ինչ հիմա է անում Աֆղանստանում՝ մեր եվրոպական դաշնակիցների հետ, ապա զայրույթ եմ ապրում, որ ԵՄ-ին Թուրքիայի անդամակցության գործընթացը դանդաղեցվում է: Բավական չէ, որ ասում են՝ Թուրքիան միայն պահպանում է ճամբարը, նաև՝ որ պետք է գտնվի վրանում»:
Ուստի ամենևին էլ պատահական չէր, որ 2010 թվականի հոկտեմբերի 24-ին Թուրքիան և Մեծ Բրիտանիան Ստամբուլում հուշագիր ստորագրեցին ԵՄ-ին Թուրքիայի անդամակցության հարցում փոխըմբռնման ու համագործակցության շուրջ, իսկ Մեծ Բրիտանիայի Միջազգային հարաբերությունների թագավորական ինստիտուտը, որը հայտնի է Chatham House անունով, 2010 թվականի նոյեմբերի 9-ին տարվա քաղաքական գործչի մրցանակը հանձնեց Թուրքիայի նախագահ Աբդուլլահ Գյուլին, որը այս տարվա նոյեմբերի 22-24-ը պետական այցով ժամանելու է Մեծ Բրիտանիա. սա լինելու է Թուրքիայի նախագահի առաջին պաշտոնական բրիտանական այցը վերջին 23 տարիների ընթացքում։
