Իհարկե, Արցախում տեղի ունեցող պատերազմն ազդել է Վրաստանում երկու խոշոր էթնիկ համայնքների՝ հայերի ու ադրբեջանցիների տրամադրությունների վրա: Այս մասին «Առաջին լրատվական»-ի հետ զրույցում նշեց «Բազմազգ Վրաստան» կազմակերպության ղեկավար Առնոլդ Ստեփանյանը՝ անդրադառնալով Վրաստանում հոկտեմբերի 31-ին կայանալիք խորհրդարանական ընտրություններին:
«Մենք արդեն հաշվարկել ենք մոտ 15 հազար մարդու, որոնք անմիջականորեն մասնակցել են տարբեր տիպի ակցիաների, որոնցում արտահայտել են իրենց վերաբերմունքը՝ կապված պատերազմի և ընդհանրապես Արցախի հակամարտության հետ: Ընդ որում, այդ ակցիաները եղել են և՛ Ջավախքում, և՛ Թբիլիսիում, և՛ Քվեմո Քարթլիում: Տեսանելի է, որ որոշ կուսակցությունների կամ քաղաքական գործիչների ելույթները, ինչպես, օրինակ, Սաակաշվիլիի, բացասաբար են ազդել այն մարդկանց թվի վրա, որոնք աջակցել կամ աջակցում են այդ քաղաքական ուժերին Ջավախքում: Բնականաբար, այդ նույն ելույթները դրականորեն են ազդել ընտրողների թվի վրա Քվեմո Քարթլիում, որտեղ ադրբեջանցիներ են ապրում: Թե այդ ազդեցությունը որքան է՝ պարզ կլինի նոյեմբերի 1-ին»,- ասաց Ստեփանյանը՝ հավելելով, որ Սաակաշվիլիի այդ հայտարարությունը կատալիզատոր եղավ այլ կուսակցությունների համար:
«Ընդհանուր առմամբ վրացական կուսակցություններից որևէ մեկը Արցախում տեղի ունեցող իրադարձությունների վերաբերյալ չի արտահայտել իր աջակցությունը կողմերից մեկին, բայց, ցավոք, քաղաքական ուժերի որոշ թեկնածուներ, որոնք մեծամասնական ընտրակարգով առաջադրված են Ջավախքում և Քվեմո Քարթլիում, շատ ակտիվորեն ներգրավվել են աջակցության կամ բողոքի մրցավազքում: Նրանք շատ ակտիվորեն արտահայտում են իրենց տեսակետները»,- ընդգծեց Առնոլդ Ստեփանյանը:
Անդրադառնալով հայ համայնքին՝ նա նշեց, որ համայնքը շարունակում է շատ ակտիվ լինել, երեկ մեծ ցույց է կազմակերպվել, միաժամանակ Ջավախքում շատ հաճախ միջոցառումներ են կազմակերպվում: «Հիմնականում ջանքերը կենտրոնացած են մարդասիրական և ֆինանսական միջոցներ հավաքագրելու վրա: Այդ գործընթացը հիմա էլ շարունակվում է: Միաժամանակ նախընտրական շրջանում վրացական կուսակցություններն օգտվում են հայերի ու ադրբեջանցիների կողմից կազմակերպվող ակցիաներից, և փաստացի ղարաբաղյան հակամարտությունը տեղափոխվում է Վրաստանի ներքաղաքական պայքարի դաշտ:
Կարծում եմ՝ կողմերից ոչ մեկին ձեռնտու չէ, որ Վրաստանը ներքաշվի այդ հակամարտության մեջ, որովհետև Վրաստանը երկու կողմի համար էլ հանդիսանում է առնվազն մարդասիրական միջանցք: Այդ գիտակցումը կա երկու կողմերում էլ, և ես տեսնում եմ, որ տեսանելի չէ ձեռագիր, որ կողմերից մեկը դիտավորյալ մեծ ցույցեր կազմակերպի»,- ընդգծեց Առնոլդ Ստեփանյանը:
