ԱՄՆ դոլարը բորսայում անցած շաբաթը փակեց 363.0 ՀՀ դրամ փոխարժեքով՝ նվազելով 0.82%-ով: Շաբաթական առքուվաճառքի ծավալները կազմել են 31.40 մլն ԱՄՆ դոլար, ինչը 66.58%-ով ավելի է, քան հուլիսի 18-22-ն ընկած ժամանակահատվածում:
Դոլարի արժեքի անկման պատճառը ներկրողների, բիզնեսի և բնակչության կողմից արժույթի պահանջարկի նվազումն է՝ ԱՄՆ հնարավոր դեֆոլտի և ամերիկյան պետական պարտքի վերին շեմի բարձրացման հարցի անորոշության, ինչպես նաև սեզոնայնության հիման վրա:
Այս շաբաթ ՀՀ-ում ամերիկյան արժույթի ճակատագրի վրա կազդեն իրադարձությունները ԱՄՆ-ում: ԱՄՆ պարտքի սահմանափակումների հարցի լուծման դեպքում Հայաստանում դոլարի պահանջարկը որոշ չափով կվերականգնվի, և դոլարը կթանկանա դրամի նկատմամբ, իսկ եթե դեմոկրատներն ու հանրապետականները չկարողանան փոխհամաձայնության գալ, դոլարի անկումը կշարունակվի ինչպես աշխարհում, այնպես էլ՝ Հայաստանում:
Նախորդ շաբաթ ՀՀ դրամի նկատմամբ 1.22%-ով անկում էր արձանագրել նաև եվրոն՝ հասնելով 524.72 դրամի: Սակայն ուրբաթ օրվա վերջում միջազգային բորսաներում եվրոն որոշ չափով վերականգնել էր դիրքերը, և, FOREX CLUB-ի վերլուծաբանների կարծիքով, այսօր՝ օգոստոսի 1-ին, ՀՀ-ում եվրոն կվաճառվի 530.0 դրամ միջին գնով:
