Հանգստյան օրերին կայացան Հայաստանի առաջնության 16-րդ տուրի հանդիպումները: Շաբաթ օրը «Փյունիկ»-ն ընդունեց «Գանձասար»-ին, «Շիրակ»-ը` «Իմպուլս»-ին: Չեմպիոնը կապանցիների հետ ոչ-ոքի` 1:1 հաշվով ավարտեց հանդիպումը և մնաց երրորդ հորիզոնականում: Հանդիպման 4-րդ րոպեին հաշիվը բացեց տանտերերի հարձակվող Էդգար Մանուչարյանը, կապանցիները պատասխան գոլը խփեցին 63-րդ րոպեին. աչքի ընկավ Անդրանիկ Սարգսյանը:
«Իմպուլս»-ը 2:3 հաշվով պարտության մատնեց «Շիրակ»-ին և 22 միավորով հավասարվեց 4-րդ հորիզոնականում ընթացող «Միկա»-ին, գոլերի հեղինակներ դարձան Անդրանիկ Բարիկյանն (36 ր.) ու Կարեն Ալեքսանյանը (90 ր.)` «Շիրակ»-ից, Արթուր Բարսեղյանը (41 ր.), Նորայր Գյոզալյանը (45+1 ր.) և Սամվել Հակոբյանը (82 ր.)` դիլիջանյան ակումբից: Նշենք, որ սա «Շիրակ»-ի արդեն երրորդ անընդմեջ պարտությունն էր ընթացիկ առաջնությունում:
Այսօր «Բանանց»-ն ընդունեց մրցաշարային աղյուսակի առաջատար «Ուլիս»-ին և հաղթեց 2:1 հաշվով` վերջինիս զրկելով միանձնյա առաջատարի դիրքից: Հանդիպման հաշիվը բացեցին հյուրերը` Գեորգի Կրասովսկին անվրեպ իրացրեց 11-մետրանոց հարված, 19 րոպե անց Բրունո Կորեան նախ հավասարեցրեց այն, ապա` 84-րդ րոպեին նույն Բրունո Կորեան անկյունայինի խաղարկումից հետո գլխի դիպուկ հարվածով հաղթանակ պարգևեց իր թիմին:
Մյուս խաղում մրցաշարային աղյուսակի ետնապահ «Արարատ»-ը սեփական հարկի տակ կարողացավ ոչ-ոքի` 1:1 հաշվով ավարտել հանդիպումը «Միկա»-ի հետ, գոլերի հեղինակներ դարձան Կարեն Խաչատրյանը (58 ր.)` «Արարատ»-ից և Արեգ Ազատյանը (70 ր.)` «Միկա»-ից:
16-րդ տուրից հետո մրցաշարային աղյուսակն ունի հետևյալ տեսքը.
1.«Գանձասար» 30 մ.
2.«Ուլիս» 30 մ.
3.«Փյունիկ» 29 մ.
4.«Միկա» 22 մ.
5.«Իմպուլս» 22 մ.
6.«Բանանց» 18 մ.
7.«Շիրակ» 13 մ.
8.«Արարատ» 10 մ.