Հայաստանի վարչապետ Նիկոլ Փաշինյանը հարցազրույց է տվել ֆրանսիական Tv5Monde հեռուստաալիքին՝ հայտարարելով՝ այս իրավիճակում պատշաճ արձագանքը կլինի այն, որ եվրոպական երկրները, միջազգային հանրությունը և կոնկրետ երկրները իրենց մեջ ուժ գտնեն և վճռական քայլ անեն ու ճանաչեն Լեռնային Ղարաբաղի անկախությունը: «Իմ ակնկալիքն իրոք այն է, որ Ֆրանսիան ուղղակի ճանաչի Լեռնային Ղարաբաղի անկախությունը»,- հայտարարել է Նիկոլ Փաշինյանը:
Ֆրանսիայում բնակվող քաղաքագետ Կայծ Մինասյանը, «Առաջին լրատվական»-ի հետ զրույցում անդրադառնալով այս հայտարարությանը, նշեց՝ Հայաստանում, Արցախում և ընդհուպ ԱՄՆ-ում մեկ պահանջ է պետք բարձրացնել՝ ճանաչել Արցախի անկախությունը. «Ուրիշ ոչինչ՝ մանավանդ այս պայմաններում։ Բոլոր սփյուռքահայերը պետք է այդ ուղղությամբ աշխատեն։ Արդյոք Ֆրանսիան կճանաչի՞ Արցախի անկախությունը, դրա նախադրյալներն ու պայմանները կան, որովհետև վտանգված է ժողովրդի գոյությունը։ Կա՛մ ուղղակի ճանաչում, կա՛մ միացում Հայաստանի հետ։ Արդյոք Ֆրանսիան կամք ունի՞ ճանաչելու. պետք է նախ տեսնել իրականությունը մարտադաշտում։ Բաքուն ագրեսոր պետություն է, և Բաքու-Անկարա զույգը համագործակցում է ահաբեկչության հետ։ Պետք է սրա համար հաշիվ տան ու դատապարտվեն»։
Ըստ մեր զրուցակցի՝ պետք է աշխատել այդ ուղղությամբ և այդ ճանապարհին ստիպել Արցախի անկախության ճանաչումը։
Եթե Թուրքիան տապալի Մինսկի խմբի հաջողությունը, արդյոք Ֆրանսիան կամք կունենա՞ այդ պայմաններում ճանաչել Արցախը՝ հարցին ի պատասխան Կայծ Մինասյանն ասաց. «Շատ հարցեր կան, որ պետք է նախ ուսումնասիրել, հետո որոշել, թե երբ պետք է ճանաչել Արցախը։ Այսօր այդ պայմաններն ավելի դյուրին են, քան նախքան սեպտեմբերի 27-ը»։
Քաղաքագետը կարծիք հայտնեց, որ աշխատանքը պետք է աշխուժացնել: «Պետք է օգտագործել բոլոր քաղաքական ղեկավարների հայտարարությունները, հավաքել այդ հայտարարությունները և դրանք օգտագործել որպես ճնշում պետությունների վրա՝ սկսած Ֆրանսիայից ու Հոլանդիայից մինչև Զատուլինի հայտարարություններ։ Մեկ ազգ, մեկ նպատակ՝ ճանաչել Արցախը՝ ապահովելու հայերի ու հայրենիքի անվտանգությունը։ Արցախի անկախությունը մարմնավորում է եվրոպական և ռուսական արժեքները: Պաշտպանել Արցախը նշանակում է պաշտպանել ազատությունը ֆաշիզմից։ Հաղթելու ենք, ուրիշ տարբերակ չկա։ Մեռնել ու զոհվել՝ հանուն ապրելու։ Հաղթել ու վերջ»,- եզրափակեց Կայծ Մինասյանը։