Այսօր վարչապետ Նիկոլ Փաշինյանը ֆեյսբուքյան գրառմամբ տեղեկացրեց, որ առաջնագծի հատվածներից մեկում ինչ-որ մարդիկ զինվորներին փորձել են համոզել, որ այս պատերազմը Նիկոլ Փաշինյանն է հրահրել, և որ սա պայմանավորված պատերազմ է, անգամ զինվորներին համոզել են նահանջել և դիրքեր հանձնել թշնամուն: Տեղեկություն կա, որ այս առնչությամբ մեկ անձ ձերբակալվել է: Դրան հաջորդեց ԱԱԾ տնօրենի աշխատանքից ազատման որոշումը:
«Առաջին լրատվական»-ի հետ զրույցում անդրադառնալով այս դիտարկմանը՝ ԱԺ «Իմ քայլը» խմբակցության պատգամավոր Գայանե Աբրահամյանը նշեց. «Այստեղ կապեր տեսնում եմ, բայց փաստեր չունեմ: Ինչ վեաբերում է դավաճանական գործողություններին, ամիսներ առաջ եմ ես ասել, որ ցավոք ընդդիմադիր որոշ ուժեր պատրաստ էին հայրենիքի դավաճանություն: Սա ինձ համար սպասելի էր: Պատերազմի առաջին իսկ օրերից ունեցել եմ այս մտահոգությունը: Ուրախ եմ, որ արագ հայտնաբերվել է, և հետագա հնարավոր զարգացումները կանխվել են: Չափազանց լուրջ պատիժ պետք է սահմանել դավաճանության համար»:
Դիտարկմանը, որ մամուլում շրջանառվող լուրերի համաձայն այդ անձը Վիտալի Բալասանյանն է կամ նրա շրջապատից մեկը, և այդ մասին Բալասանյանը չի հերքել լրատվամիջոցներից մեկի հետ զրույցում, Գայանե Աբրահամյանը արձագանքեց. «Ես չգիտեմ, թե ովքեր կարող են լինել այդ մարդիկ, կարող եմ միայն ողջամիտ կասկածներ ունենալ, բայց այն իրավիճակը, ինչ 90-ականներին տիրում էր Ադրբեջանում, հիմա փորձում են իրականացնել Հայաստանում… Մենք ներքաղաքական հարցերը մոռանալու կոչեր արեցինք, և՛ խորհրդարանական ուժերը, և՛ մի քանի արտախորհրդարանական ուժեր դա հաստատեցին, ի պատիվ իրենց, բայց որոշ ընդդիմադիր ուժեր պատրաստ են նաև երկրի դավաճանության: Այսօր, բոլոր ուժերը ներգրավելով, պետք է կանխենք նման դեպքերը, կարծում եմ այդպիսի գործողությունների որակումն ու ու պատիժը պատերազմի հաղթական ավարտից հետո պիտի տանք:
Մանրամասները տեսանյութում:
