Տեղի ունեցողը ողբերգություն է, մարդիկ են զոհվում, և պետք է արագ դադարեցնել կրակը՝ հոկտեմբերի 7-ին հայտարարել է ՌԴ նախագահ Պուտինը՝ անդրադառնալով արցախյան գոտում ստեղծված պատերազմական իրավիճակին: Պուտինը փաստորեն Արցախի դեմ սանձազերծված պատերազմից 11 օր անց է անում առաջին հրապարակային անդրադարձը: Մինչ այդ նա չորս հեռախոսազրույց է ունեցել Փաշինյանի հետ, ինչպես նաև հեռախոսազրույց է ունեցել Մակրոնի, Լուկաշենկոյի և անգամ Տաջիկստանի նախագահ Ռահմոնի հետ: Պուտինի խոսնակ Պեսկովը մինչ այդ հայտարարել էր, որ նա առայժմ չի տեսնում Ալիևի և Էրդողանի հետ խոսելու անհրաժեշտություն:
Պուտինը հայտարարել է, որ հակամարտության կարգավորումը հեռու է, բայց կրակը պետք է դադարեցնել: Նա միաժամանակ ասել է, որ Հայաստանի ղեկավարությունը հարցեր չունի ՌԴ-ին դաշնակցային պարտավորությունների կատարման առումով: Ի՞նչ է դա նշանակում՝ Պուտինն ակնարկում է, որ Ռուսաստանը դաշնակցային պարտավորությունն իրականացնում է իրավիճակից բխող անհրաժեշտ ծավալով և զգուշացնում է այդ մասին Անկարայի՞ն, թե՞ Պուտինը ակնարկում է, որ սպասում է Հայաստանի օգնության դիմումին:
Տրամաբանությունը հուշում է, որ զուտ ֆորմալության իմաստով, իհարկե, Ռուսաստանի միջամտությունը ոչ թե ինքնահոս մեխանիզմի, այլ հենց պաշտոնական դիմումի հարց է: Խնդիրը, սակայն, այն է, թե որն է ՌԴ նախագահի առաջին հրապարակային անդրադարձի տողատակում: Միևնույն ժամանակ հատկանշական է այդ համատեքստում Հայաստանի վարչապետի հայտարարությունը բրիտանական BBC-ին տված հարցազրույցում, որտեղ Նիկոլ Փաշինյանը հայտարարել է, որ Ռուսաստանը հավաստիացրել է Հայաստանին անհրաժեշտության դեպքում դաշնակցային պարտավորությունների կատարման հարցում:
Պետք է ենթադրել, որ Պուտինի ակնարկն այդուհանդերձ ունի, ավելի շուտ կամ առնվազն՝ ավելի շատ, առաջին տողատակը, այսինքն՝ նախազգուշացում կամ զգուշացում Անկարային, ինչն անշուշտ բխում է առաջին հերթին հենց Ռուսաստանի շահից, որովհետև սանձազերծված պատերազմը ոչ միայն Արցախի դեմ է, այլ նաև Ռուսաստանի, և Անկարան հաստատվում է Կովկասում կամ ձգտում է հաստատվել Կովկասում ոչ այլ ինչի, քան հենց Ռուսաստանի ներկայության հաշվին:
Եվ ամենահատկանշականը այն է, որ Պուտինը անձամբ հրապարակային անդրադառնում է իրավիճակին առաջին անգամ այն բանից հետո, երբ Արցախի դեմ թուրք-ադրբեջանական գրոհից 11 օր անց նրան է զանգահարում Ադրբեջանի նախագահ Ալիևը՝ ծննդյան օրը շնորհավորելու առիթով:
