Բելառուսի առաջնորդ Ալեքսանդր Լուկաշենկոյի քաղաքային նստավայրը պահպանելու համար զրահամեքենաներ են բերվել Մինսկի կենտրոն: Այդ մասին հաղորդում է «Ինտերֆաքս»-ը:
Մոտ տասը զրահավոր փոխադրիչ մեքենա է նկատվել քաղաքի կենտրոնում: Դրանք մտել են Անկախության պալատի տարածք՝ Պետական դրոշի հրապարակի հարևանությամբ:
Այստեղ կայանված է նաև ռազմական տեխնիկա և փշալարեր տեղափոխող ավտոմեքենաներ: Հրապարակը շրջապատված է ոստիկանների և զինվորականների կրկնակի օղակով:
Օգոստոսի 9-ին Բելառուսում անցկացվեցին նախագահական ընտրություններ: Հանրապետությունում ընտրական տեղամասերի փակումից հետո զանգվածային բողոքի ակցիաներ սկսվեցին արդյունքների կեղծման դեմ: Ըստ ԿԸՀ-ի՝ հաղթել է երկրի գործող ղեկավար Ալեքսանդր Լուկաշենկոն: Ընդդիմության թեկնածուների բոլոր շտաբները հայտարարել են, որ չեն ճանաչում ընտրությունների պաշտոնական արդյունքները: Լուկաշենկոյի երդմնակալությունը տեղի է ունեցել սեպտեմբերի 23-ին:
