Երևանում գործող հյուրանոցներից տեղեկացնում են, որ այս տարի աշխատում են խիստ ծանրաբեռնված ռեժիմով։ Պատվերների քանակը մեծացել է հատկապես վերջերս՝ հուլիսի սկզբից։
«Անի» հյուրանոցը, օրինակ, այս օրերին զբաղեցված է մոտ 90%-ով։ Հյուրանոցի ադմինիստրացիայից հայտնում են, որ նախորդ տարվա այս ժամանակահատվածի համեմատ հաճախորդների թիվը զգալիորեն աճել է։ Ի դեպ, այս սեզոնին զգալիորեն ավելանում են նաև հյուրանոցի սպասարկման գները։ Եթե ոչ սեզոնային շրջանում մի հոգու համար համեստ սենյակն արժե 35,000 դրամ, ապա սոզոնին դրա գինը 41,000 դրամ է։ Համարյա նույնքան ավելացել են նաև երկտեղանի, բիզնես կլասի սենյակների գները։
Armenia Mariott հյուրանոցից տեղեկացնում են, որ հյուրանոցում, որպես կանոն, ամենաակտիվ շրջանը սեպտեմբեր ու հոկտեմբեր ամիսներն են։ Սակայն ամռանը ևս ակտիվ է, ինչը պայմանավորված է ոչ միայն տուրիստական սեզոնով, այլև մի շարք կոնֆերանսներով ու պետական այցերով, որոնց հյուրերը իջևանում են Mariott-ում։
Golden Tulip Yerevan և Եվրոպա հյուրանոցներից նույնպես տեղեկացնում են, որ վերջին մի քանի շաբաթվա ընթացքում ընդունել են առավելագույն թվով հյուրերի։ «Եվրոպա» հյուրանոցից հայտնում են, որ սպասարկման գները զգալիորեն բարձացվել են, թեև, չնայած դրան, պատվերների պակաս չի զգացվում։
