Ռուսաստանի նախագահ Վլադիմիր Պուտինը «Ռոսիա 1» հեռուստաալիքով Սերգեյ Բրիլյովին տված հարցազրույցում ասել է, որ իր դուստրը պատվաստվել է կորոնավիրուսի դեմ փորձնական պատվաստանյութով: Եվ նա դա արել է առանց հայրիկի հետ խորհրդակցելու՝ գրում է mk.ru-ն:
Պուտինը նշել է, որ արդեն հայտնի է, որ պատվաստանյութը անվնաս է, քանի որ կլինիկական և նախակլինիկական փորձարկումներ են իրականացվել կենդանիների, ապա կամավորների վրա: Մարդկանց մոտ ձևավորվում են հակամարմիններ և կայուն իմունիտետ, ինչպես դա եղել է նրա դստեր մոտ:
Պուտինը նշել է, որ պատվաստանյութը առաջին անգամ ներարկելուց հետո աղջիկը 38,4 ջերմություն է ունեցել, այնուհետև իջել է 37 աստիճանի: Եվ հետո ամեն ինչ անցել է: Երկրորդ անգամ նա պատվաստանյութ է ստացել 21 օր հետո, որից հետո ջերմությունը դարձյալ փոքր-ինչ բարձրացել է: «Նա շփվում է մեծ թվով մարդկանց հետ, և, իհարկե, նորմալ աշխատելու համար անհրաժեշտ է, որ իրեն պաշտպանված զգա», – բացատրել է Ռուսաստանի առաջնորդը իր դստեր քայլը:
