«Իմ քայլը» խմբակցության պատգամավոր Տիգրան Ուլիխանյանը հիմնազուրկ է համարում «Լուսավոր Հայաստան» կուսակցության ղեկավար Էդմոն Մարուքյանի այն հայտարարությունը, թե ոչ մի պրոֆեսիոնալ չի համաձայնի աշխատել Նիկոլ Փաշինյանի գլխավորած կառավարությունում:
«Այս պահին մեր կարող ուժերը ցանկանում են և ցանկություն կհայտնեն առաջարկի դեպքում աշխատելու մեր կառավարության հետ՝ ես դրանում կասկած չունեմ: Պրոֆեսիոնալների ներգրավման կարևորագույն խնդիրը, իմ գնահատմամբ, աշխատավարձերի հետ է կապված. մասնավոր ոլորտում պրոֆեսիոնալների աշխատավարձերը մոտ 5-10 անգամ ավելի բարձր են»,- «Առաջին լրատվական»-ի հետ զրույցում ասաց Տիգրան Ուլիխանյանը՝ հավելելով, որ իրենց առաջարկը մերժելու դեպքում իրենք տվայտանքների մեջ չեն ընկնի:
Մեր զրուցակիցը կարևորում է հանրության դժգոհությունը և կարծում է, որ այդ դժգոհությունը միշտ է լինելու: «Այդ դժգոհությունն է լինելու շարժիչ ուժը, դժգոհությունն է երաշխիքը, որ կառավարությունը, իշխող քաղաքական ուժը լճացում չի ունենա, արխային չի ընկնի և անընդհատ կփորձի կատարելագործվել»,- նշեց նա և ավելացրեց՝ լրատվամիջոցների զգալի մասը հատուկ դիտավորությամբ չի ներկայացնում կատարված աշխատանքները և ներկայացնում է միայն խնդիրները:
Խաշթառակում տեղի ունեցած ողբերգության վերաբերյալ էլ «Իմ քայլի» պատգամավորն ընդգծեց. «Իշխանության որևէ ներկայացուցիչ մեղավորություն չունի, որովհետև մեղավորությունը անհատական երևույթ է: Մենք կարող ենք խոսել քաղաքական պատասխանատվության մասին, իսկ մենք քաղաքական պատասխանատվություն ենք կրում ՀՀ-ում տեղի ունեցող ցանկացած իրադարձության վերաբերյալ: Ճանճի տզզոցն էլ մեր քաղաքական պատասխանատվությունն է»:
Մանրամասն՝ տեսանյութում:
