Ինչպես և սպասվում էր, կորոնավիրուսով պայմանավորված իրավիճակն ամենաշատը հարվածեց մշակույթի ոլորտին, մշակույթն ամենախոցելին էր: «Առաջին լրատվական»-ի հետ զրույցում անդրադառնալով այս դիտարկմանը,ԿԳՄՍ նախարարի տեղակալ Նարինե Թուխիկյանը նշեց, որ պարետատունն արդեն արտոնել է մշակութային հաստատությունների աշախատնքը, որը մեծ երջանկություն է ոչ միայն հասարակության, այլ նաև մշակութային հաստատությունների աշխատակիցների համար. «Թանգարանները օգոստոսի 19-ից սկսած՝ փուլային բացվեցին, այս երեքշաբթի բացվեցին նաև գրադարանները, նաև բացօթյա թատերական հանդիսություններ են ներկայացվում, ինչը շատ ոգևորիչ է»:
Անդրադառնալով հարցին, թե ինչու մշակութային հաստատությունները բացվեցին ավելի ուշ, քան հագուստի առևտրի կենտորնները, Նարինե Թուխիկյանը պատասխանեց, որ, թերևս, պատճառն այն էր, որ մշակութային հարթակները կարողացան առցանց աշխատել:
Կառավարությունը հակաճգնաժամային ծրագրեր է իրականացնում, կան ծրագրեր, որոնք վերաբերում են մշակույթին: Նախարարի տեղակալի խոսքով՝ իրականացվելու է անհատ ստեղծագործողներին աջակցության ծրագիր. «Հայտերը կուսումնասիրվեն, հաղթողներին կհատկացվեն գումարներ որևէ կազմակերպության միջոցով՝ իրենց մշակութային ծրագերն իրականացնելու համար»:
Ֆիրդուսի շուրջ զարգացումները խթան հանդիսացան և միավորեցին քաղհասարակության ներկայացուցիչներին և մասնագիտական հանրությանը. խնդիրը հետևյալն է՝ ինչու հեղափոխությունից երկու տարի անց նորից ականատես ենք լինում մի իրավիճակի, երբ քանդվում են պատմամշակութային հուշարձաններ: Այս հարցին ի պատասխան՝ Նարինե Թուխիկյանը նշեց, որ Ֆիրդուսիի քանդված շենքերը պատմամշակութային հուշարձաններ չեն, հուշարձանների ցանկում չկան: «Այդ շենքերը հուշարձանների կարգավիճակ չունեն, եկեք անկեղծ լինենք: Չենք կարող հերքել, որ 19-րդ դարում են կառուցվել, բայց փորձագիտական մասնագիտական խումբն այդ շենքերը չեն ճանաչել որպես հուշարձան… Մենք սիրում ենք մասնագիտական կարծիքների ետևից գնալ, դրանք շատ արժեքավոր են մեզ համար»:
Մանրամասն՝ տեսանյութում: