Դեմոկրատական կուսակցության ԱՄՆ նախագահի թեկնածու Ջո Բայդենն ընտրություններում հաղթելու դեպքում Ուկրաինային մահաբեր զենք կտրամադրի:
Այս մասին նա հայտարարել է Ուկրաինայի Անկախության օրվան նվիրված շնորհավորական ուղերձում, որը հրապարակվել է պաշտոնական կայքում:
Ջո Բայդենը նշել է, որ արդեն վեցերորդ տարին անընդմեջ շարունակվում է ռուսական ագրեսիան, Ուկրաինայի տարածքի մի մասը Արևելքում և Ղրիմը շարունակում են բռնազավթված մնալ Ռուսաստանի կողմից:
Նա նշել է, որ Ուկրաինան փաստացի պատերազմ է վարում «երկու ճակատով». Արևելքում`Ռուսաստանի դեմ և երկրի ներսում` օրենքի գերակայության համար:
«Որպես նախագահ, ես Կրեմլին կհասկացնեմ՝ ժամանակն է, որ Ռուսաստանը դադարեցնի Ուկրաինայի դեմ ագրեսիան և բռնազավթումը: Բայդենի վարչակազմը հոգ կտանի, որ Ուկրաինան անհրաժեշտ տնտեսական և ռազմական աջակցություն ստանա, ներառյալ մահացու զենք:
Միևնույն ժամանակ, մենք կաջակցենք Ուկրաինային հաջողության համար կենսական նշանակություն ունեցող բարեփոխումները շարունակելու գործում»,- ասել է Ջո Բայդենը:
Բայդենը նշել է, որ կայուն, անկախ, ժողովրդավարական և բարգավաճող Ուկրաինան լավ է նաև Միացյալ Նահանգների համար:
