Այսօր ՕԵԿ փոխնախագահ և երկխոսության պատվիրակության աշխատանքային խմբի ՕԵԿ ներկայացուցիչ Մհեր Շահգելդյանը նշեց, որ բոլորի համար պարզ է, որ ձևավորվել է օրակարգ։ Սակայն թե այն ինչ հանգուցալուծում կստանա՝ ցույց կտա հաջորդ հանդիպումը:
Լրագրողների այն դիտարկմանը, թե ՀԱԿ-ը շարունակում է կամ-կամ-ով խոսել՝ Շահգելդյանը արձագանքեց, որ ՀԱԿ-ը խնդիրների լուծման համար գնում է երկխոսության ճանապարհով, իսկ նման հայտարարություններ անում է մամուլի համար, ավելին՝ իրենք նման հայտարարություններից չեն վախենում, քանի որ ոչ ոք նման հայտարարություններով չի կարող ոչ ոքի ճնշել:
Նա առիթը չկորցրեց ընդգծելու, որ իրենց կուսակցությունում տեղի են ունեում կուսակցաշինական աշխատանքներ, ընդգրկվում են բազմաթիվ մարդիկ հասարակության տարբեր խմբերից՝ մտավորականներ, իրավաբաններ, մարզերում նոր կառույցներ են հիմնվում: Լրագրողները բազմաթիվ հարցադրումներից հետո պարզեցին, որ 100 հազար ՕԵԿ-ական կա։ Ի դեպ, ամիսներ առաջ տեղեկացրել էին, որ Հակոբ Հակոբյանը՝ Ճոյտը, անդամագրվելու է ՕԵԿ-ին։ Շահգելդյանը այս ինֆորմացիան չհերքեց՝ ավելացնելով, որ մարդիկ գալիս են ՕԵԿ իրենց անձնական ցանկությամբ և ցանկանում են իրենց ներդրումն ունենալ երկրի հասարակական-քաղաքական կյանքում:
