Այսօր Rreuters գործակալությունը, հղում անելով մի շարք բարձրաստիճան աղբյուրների, հայտնել է, որ վարչապետ Վալադիմիր Պուտինը գրեթե որոշել է առաջադրել իր թեկնածությունը 2012 թ. նախագահական ընտրությունների ժամանակ՝ դրանով իսկ շրջանցելով գործող նախագահ Դմիտրի Մեդվեդևին, որին վարչապետի շրջապատում ոչ պոպուլյար են համարում երկրորդ անգամ առաջադրվելու համար:
«Ես կարծում եմ, որ Պուտինը պատրաստվում է մասնակցել ընտրություններին, նա արդեն ընդունել է նման որոշում»,- ասել է աղբյուրներից մեկը: Գործակալության զրուցակիցն ասել է, որ Պուտինը մտահոգված է այն զգացողությամբ, որ նախագահի պաշտոնում իր հետնորդը՝ Դմիտրի Մեդվեդևը, չունի անհրաժեշտ աջակցություն քաղաքական և գործարար էլիտաներում, ինչպես նաև բավականաչափ ժողովրդականություն չի վայելում, իսկ դա թույլ չի տա անցկացնել անհրաժեշտ բարեփոխումները:
«Պուտինն ավելի շատ մարդկանց աջակցությունն է վայելում, քան Մեդվեդևը: Մեդվեդևը գերագնահատեց իր քաշը համակարգի մեջ»,- ասել է գործակալության զրուցակիցը: Մեկ այլ աղբյուր պնդել է, որ «Պուտինը ցանկանում է վերադառնալ, ընդ որում՝ շատ է ցանկանում»: Նշվում է նաև, որ վերադառանալով Կրեմլ՝ Պուտինը բարեփոխիչ վարչապետ կնշանակի, որպեսզի փարատի բոլոր մտահոգությունները, թե Խորհրդային միությունը վերադառնում է:
Մինչդեռ Կրեմլում այս տեղեկությունները զուտ ասեկոսեներ են անվանում։ «Ես չեմ հասկանում, թե որտեղից են գալիս այս լուրերը: Նախագահն ու վարչապետը շփվում են ոչ միայն գործնական, այլ նաև ոչ ֆորմալ մակարդակում նույնպես»,- Reuters-ին ասել է Մեդվեդևի խոսնակ Նատալյա Տիմակովան: Իսկ Կրեմլի անանուն աղբյուրն էլ ասել է, որ նախագահի թեկնածու առաջադրվելու հարցը Պուտին-Մեդվեդև տանդեմը դեռ չի որոշել: «Պետք է քննարկել ոչ թե էլիտաների աջակցության հարցը, այլ թե ով ավելի շատ աջակցություն ունի ժողովրդի մեջ… Էլիտայի աջակցությունը չունի որոշիչ դեր, որպեսզի առաջ շարժվենք»,- ասել է Կրեմլի աղբյուրը:
