Թուրքական Sabah թերթի փոխանցմամբ՝ Ադրբեջան մեկնելուց առաջ Թուրքիայի վարչապետ Էրդողանը պատասխանել է լրագրողների հարցերին.
«Մենք բոլոր ջանքերը կգործադրենք տարածաշրջանում կայունության վերականգնման համար։ Միևնույն ժամանակ մենք մտադիր ենք ավելի զարգացնել Ադրբեջանի հետ մեր հարաբերությունները։
Այսուհետ նույնպես զարգացում կապրեն Թուրքիայի ու Ադրբեջանի միջև էներգետիկ նախագծերը։ Իմ ադրբեջանական այցի ժամանակ մենք քննարկելու ենք դրանց և մասնավորապես Nabucco գազատարի նախագծի «ճանապարհային քարտեզը» և այդ նախագծի իրագործման ժամկետի հարցը։
Այդ նախագիծը կամրապնդի երկու երկրների հարաբերությունները և կնպաստի կովկասյան տարածաշրջանում կայունության հաստատմանը»։
Հիշեցնենք, որ Ադրբեջանը հրաժարվեց մասնակցել հունիսի 8-ին Թուրքիայի Կայսերի քաղաքում Nabucco Gas Pipeline International GmbH կոնսորցիումի և Nabucco գազատարի նախագծին աջակցող տարանցիկ երկրների (Ավստրիա, Բուլղարիա, Հունգարիա, Ռումինիա և Թուրքիա) միջև համաձայնագրի ստորագրմանը։
