Բրիտանիայի կառավարությունը Իսպանիան, որում վերջին շրջանում վատացել է կորոնավիրուսի հետ կապված իրավիճակը, հանեց այն երկրների ցանկից, որոնցից ժամանելիս 14-օրյա կարանտին անցնելու անհրաժեշտություն չկա, հայտնում է «ՌԻԱ Նովոստին»:
«Իսպանիայից Միացյալ Թագավորություն վերադառնալիս մարդիկ ստիպված կլինեն երկու շաբաթ ինքնամեկուսանալ, քանի որ երկիրը դուրս է մնացել օդային միջանցքների ցանկից», – ասված է Մեծ Բրիտանիայի տրանսպորտի նախարարության՝ ՌԻԱ Նովոստիին ուղղված հայտարարության մեջ:
Իսպանիա այցելած զբոսաշրջիկները կարող են արձակուրդի մնացած մասն այնտեղ անցկացնել, բայց վերադառնալուց հետո ստիպված կլինեն մեկուսանալ:
«Մեծ Բրիտանիայի արտաքին գերատեսչությունը խորհուրդ է տալիս ձեռնպահ մնալ դեպի Իսպանիա ուղևորություններից, եթե խիստ անհրաժեշտություն չկա», – ասվում է հայտարարության մեջ:
Կառավարության հայտարարությանը հաջորդեց չվերթների չեղարկումը: Այսպիսով, TUI տուրօպերատորը չեղյալ է հայտարարել Իսպանիա և Կանարյան կղզիներ բոլոր չվերթները, որոնք նախատեսված էին կիրակի՝ հուլիսի 26-ին:
Իսպանիայի առողջապահության նախարարության տվյալների համաձայն ՝ ամենամտահոգիչը Կատալոնիայի և Արագոնի վիճակն է, որի իշխանությունները տարբեր սանիտարական միջոցներ են ներդնում՝ կախված համայնքներում համաճարակաբանական իրավիճակից: Օրինակ՝ Կատալոնիայի մի քանի շրջանների, այդ թվում ՝ Բարսելոնայի բնակիչներին խորհուրդ չի տրվում դուրս գալ առանց խիստ անհրաժեշտության: