«Ցանկացած նորմալ մարդ դրսևորվելու շատ լայն սպեկտր, հնարավորություն ունի: Դա կարող է գիտամանկավարժական ոլորտում լինել, դա կարող է հասարակական գործունեության մեջ լինել, բիզնես ոլորտում լինել: Այնպես որ, ինչ-որ մի տեղ ես անպայման ինձ կդրսևորեմ»,- այս մասին Մոսկվայից վերադառնալուց հետո մեզ հետ զրույցում տեղեկացրեց Լոռու մարզի արդեն նախկին մարզպետ Արամ Քոչարյանը:
– Պարոն Քոչարյան, հուլիսի 12-ին հրաժարականի դիմում ներկայացնելուց հետո, 14-ին մեկնեցիք Մոսկվա բուժվելու նպատակով, սակայն շաբաթ օրը տեղեկացանք, որ վերադարձել եք, քանի որ իշխանական վերնախավից զանգել կանչել են:
– Չէ՛, դա այդպես չէ: Ես գնացի Մոսկվա ստուգման նպատակով: Արդեն մեկ տարի շարունակ առողջական խնդիրներ ունեի, որը ինձ անհանգստացնում էր: Օգտվելով առիթից՝ գնացի Ռուսաստանի Դաշնության Բակուլևի անվան սրտաբանական ինստիտուտում ստուգվեցի: Ավելին՝ ստուգվեցի մի շատ հայտնի բժշկի մոտ, որը ազգությամբ հայ էր՝ ակադեմիկոս Ալեքյանի մոտ: Այդ մարդը ասաց, որ խնդիրներ կան, բայց վտանգավոր չեն: Ամեն դեպքում հարկավոր է ուշադիր լինել, խորհուրդ տվեց չլարվել և հավատացրեց, որ վիրահատության կարիք չկա: Բուժվեցի մի քանի օր և կուրսը ավարտելուց հետո վերադարձա:
– Դուք ինքներդ հասկացա՞ք , թե որն էր Ձեր հրաժարականի դիմումի պատճառը: Մամուլով արտահոսք եղավ, որ վարչապետին ասել եք, թե գնում եք Սանկտ Պետերբուրգ, բայց գնացել եք Վրաստան: Հրաժարականի այս վարկածը իրականությանը համապատասխանո՞ւմ է, թե՞ ոչ:
– Ախր դրանք մանր խոսակցություններ են: Ես ինքս էլ արդեն երկար ժամանակ մտորում էի հրաժարականի մասին, քանի որ առողջական խնդիրներ կային: Զգում էի, որ լարվածությունը օր օրի ավելանում է: Ստեղծվեց մի իրավիճակ, որ ինքնաբերաբար խնդրեցի նաև հրաժարականի մասին: Այդ գրված վարկածը մանր բաներ են, որ իրականում չէին կարող ազդեցություն ունենալ այս գործընթացի վրա: Ես ինքս զգում էի, որ հոգնում եմ: Հարկավոր է մտածել, որ ավելի երիտասարդներ կան, սերնդափոխությունն էլ նորմալ երևույթ է: Ինձ համար մի գործ կգտնվի, մի տեղ կաշխատեմ, ինչ է եղել:
– Ձեզ հետ զրույցից տպավորություն է ստեղծվում, որ այդ հարցում քաղաքական պատվեր ասվածը գոյություն չունի: Ճի՞շտ եմ հասկանում:
– Բացարձակապես նման բան չկա: Ես ձեզ տղամարդավարի ազնվորեն ասում եմ, որ նման բան չկա: Եթե ինձ հավատում, հարգում եք և ծանոթ եք իմ անցած ճանապարհին, պետք է հավատաք, որ նման բան չկա:
– Իսկ վարչապետի հետ հարաբերություններն ինչպե՞ս են:
– Մենք վարչապետի հետ շատ լավ հարաբերություններ ենք ունեցել և մինչև հիմա էլ ունենք այդ հարաբերությունները: Ավելին՝ շատ լավ ենք բաժանվել վարչապետի սենյակից:
– Իսկ շարունակո՞ւմ եք մնալ «Հանրապետական» կուսակցության անդամ:
– Ես «Հանրապետական» կուսակցության ակունքներում կանգնած մարդ եմ՝ 1997թ.-ից, բավականին հանրապետականներ կան, որ իմ խորհրդով, միջոցով, իմ տարիների ընթացքում են անդամագրվել կուսակցությանը: Կուսակցական բջիջները 1996-1997թթ.-ին 4-5 հոգով էինք մենք մարզի առանձին բնակավայրերում ստեղծել: Այսինքն՝ մենք կանգնած ենք այդ կուսակցության ակունքներում: Ինձ համար այդ կուսակցության ճակատագիրը միևնույն չէ: Ամեն ինչ անելու եմ, որ իմ հարազատ կուսակցությունը որքան հնարավոր է ավելի մեծ հեղինակություն ունենա մարզում առաջիկա ընտրություններին:
– Դուք նշեցիք, որ Ձեզ համար մի աշխատանք կգտնվի. ո՞ր ոլորտում կամ ի՞նչ պաշտոնում կցանկանայիք Ձեզ տեսնել մարզպետի պաշտոնից հետո:
– Ճիշտն ասած, այս պահին դեռ հոգնածությունս չի անցել: Ցանկացած նորմալ մարդ դրսևորվելու շատ լայն սպեկտր, հնարավորություն ունի: Դա կարող է գիտամանկավարժական ոլորտում լինել, դա կարող է հասարակական գործունեության մեջ լինել, բիզնես ոլորտում լինել: Այնպես որ, ինչ- որ մի տեղ ես անպայման ինձ կդրսևորեմ: 58 տարեկան մարդը, կարծում եմ, որ կարող է դեռ իր ուժերը ինչ-ինչ ոլորտներում փորձել և հաջողություններ ունենալ ճիշտ գործելու դեպքում:
– Բիզնես ասելով՝ ի՞նչ նկատի ունեք, և մարզպետ լինելու տարիներին արդյո՞ք բիզնես չեք հիմնել:
– Այս պահի դրությամբ չեմ կարող ասել, որովհետև շատ հնարավոր է, որ բիզնեսով չզբաղվեմ: Մարզում բոլորին է հայտնի, որ ես բիզնես չունեմ անձնական, որը հայտնի լինի, կամ գոնե որի մասին մարդիկ իմացած լինեն:
– Լոռու մարզպետի պաշտոնում արդեն Ձեզ փոխարինողների անուններն են հնչում: Հավանական թեկնածուների շարքում են ՀՀԿ-ական նախկին մարզպետ Հենրիկ Քոչինյանը, Հանրային հեռուստառադիոխորհրդի անդամ Վահրամ Բաղդասարյանը, Լոռու մարզային վարչության պետ Անուբախ Համբարյանը, ԱԺ պատգամավոր Կարեն Սարիբեկյանը: Եթե կարելի է՝ նշեիք, թե ո՞ւմ կցանկանայիք տեսնել մարզպետի պաշտոնում: Նրանցից ո՞վ է, ըստ ձեզ, արժանի այդ պաշտոնին:
– Ճիշտ չի լինի իմ կողմից ներկա պահին անուններ հնչեցնել, բայց կուզենամ լինի այնպիսի մարդ, որը «Հանրապետական» կուսակցության հեղինակությունը է՛լ ավելի բարձրացնի, ավելի եռանդով աշխատի: Յուրաքանչյուր նորը նախորդներին պետք է շատ հարցերում գերազանցի: Ես կուզենայի այդպիսի մարդ լինի:
– Ի՞նչ կիսատ գործեր թողեցիք, որ կցանկանայիք ավարտին հասցվեր:
– Իմ պաշտոնավարման ընթացքում երկու գերխնդրի մասին տարբեր առիթներով, հանդիպումներում առանձնացրել եմ: Մեկը, որ երկրաշարժից անօթևան մնացած ընտանիքների բնակարանների ապահովման ծրագիրն ամբողջությամբ ավարտին հասցվի, որի վերջնաժամկետը 2013թ.-ի հունվարի 1-ն է, և Շինարարական համալիրը վերագործարկված տեսնել: Երկուսն էլ ընթացքի մեջ են, հուսով եմ, որ մեկ ուրիշին բախտ կվիճակվի պաշտոնապես տանել այդ ամենը:
– Եվ վերջին հարցս: Այս տարիների ընթացքում Ձեզ ի՞նչ տվեց մարզպետի պաշտոնը:
– Շատ բան տվեց, որի շուրջ թերևս առանձին խոսենք: Այդ պաշտոնը իր բարդությամբ, դժվարություններով տվեց շատ հագեցված առօրյա: Գրեթե հանգստանալու ժամանակ չեմ ունեցել: Անգամ գիշերը երազումս կամ առավոտյան ուղեղիս մեջ աշխատանքն էր: Տվեց ե՛ւ հաջողություններ, ե՛ւ ձեռքբերումներ, որոնցով ուրախացել ենք: Այդ պարագայում ինձ շատ լավ եմ զգացել: Երբեմ նաև տխրել եմ, երբ հարաբերական ձախողումներ ենք ունեցել: Միաժամանակ, շատ լավ մարդկանց հետ եմ շփվել: Շփվել եմ մարզի ազգաբնակչության հետ: Գրեթե բոլոր համայնքներում շատ-շատ լավ բարեկամներ, մտերիմներ ունեմ: Այնպես որ, շատ հագեցած են եղել մարզպետի պաշտոնում իմ աշխատանքային տարիները: Հետևաբար՝ այս պահին միանշանակ երկու նախադասությամբ, բառով գնահատել, թե ինչ տվեց մարզպետի պաշտոնը՝ դժվար է: Այս պահին, թերևս, ամփոփելով ասեմ, որ շատ-շատ լավ հուշեր տվեց: Վերջիվերջո, հուշերն է, որ մնայուն են և ուղեկցում են մեզ մեր ամբողջ կյանքում: Իսկ նրանք որքան խոսուն են լինում, այնքան արժեքավոր են դառնում:
