ԱԺ ՀՅԴ խմբակցության պատգամավոր Արծվիկ Մինասյանն այսօր լրագրողների հետ հանդիպմանը իր մտահոգությունը հայտնեց Ջավախքի հետ կապված վերջին զարգացումների առնչությամբ: Նրա խոսքերով՝ Ջավախքը գնում է ազգային դիմագիծը կորցնելու ճանապարհով. Հայաստանի իշխանությունները կրավորական դիրքորոշում ունեն, դրան գումարվում է առանձին անձանց անձնական շահերով պայմանավորված ձգտումը՝ նպաստել Ջավախքի հայաթափմանը:
Արծվիկ Մինասյանը տեղեկացրեց, որ հուլիսի 24-ին Ջավախքում անցկացված Տերյանական օրեր միջոցառմանը իրեն և «Ժառանգության» ներկայացուցիչ Արմեն Մարտիրոսյանին թույլ չեն տվել հանդես գալ ելույթով՝ քաջ գիտակցելով, որ հնչելու են ջավախահայության մասին խոսքեր: «Ցավոք, այս անգամ բացահայտ հակահայ կեցվածքով արգելեցին օգտագործել Ջավախք, ջավախահայություն անվանումները»: Ցավալին այն է, որ վրացական իշխանությունների այս քաղաքականությանը գումարվում է Հայաստանի իշխանությունների կրավորական կեցվածքը, ինչը կամա թե ակամա աջակցում է վրացիներին:
Ա.Մինասյանն իր վրդովմունքն արտահայտեց այն կապակցությամբ, որ մեր իշխանությունները, փոխանակ մտածելու՝ ինչպես օրակարգային դարձնել հայապահպանությունը Ջավախքում, դժվարացնում են ջավախահայության Հայաստան գալը, և սա՝ այն ֆոնի վրա, երբ 2009 թվականի սեպտեմբերի 1-ին Սերժ Սարգսյանը հայտարարել էր վիրահայությանը աջակցություն ցուցաբերելու մասին: «Բացահայտորեն իրականացվում է հայաթափման քաղաքականություն: Իրականությունը լրիվ այլ է։ Պետք է պահանջել հատուկ ռազմավարություն՝ առանց նսեմացնելու հայ մարդու արժանապատվությունը»:
Ա.Մինասյան տեղեկացրեց, որ իրենց արգելել են ելույթ ունենալ Վրաստանի խորհրդարանի պատգամավոր Հենզել Մկոյանը, շրջանային ժողովի նախագահ Վոլոդյա Ստամբոլցյանը, որոնք թեև նախապես դեմ չեն եղել հայ պատգամավորների ելույթներին, սակայն հետագայում վրացական ազգային անվտանգության պատասխանատուների ճնշման տակ փոխել են իրենց դիրքորոշումը:
Ըստ պատգամավորի՝ հակահայ քաղաքականության ամենավառ դրսևորումն այն էր, որ «Տերյանական օրեր» միջոցառումն ամբողջությամբ անցկացվում էր ռուսերենով: «Ողջույնի առաջին խոսքից հետո արդեն պարզ էր, որ ընթացքը գնում էր իրենց նախանշած ուղությամբ: Մարդկանց այդ տեսակն է նպաստում, որ կորցնում ենք մեր ազգային դիմագիծը: Այդ տեսակը ավելի է բազմանում Հայաստանի իշխանությունների կրավորական կեցվածքի պատճառով»:
