Հունիսի 25-ին նորաստեղծ «Ազգային-ժողովրդավարական բևեռ» նախաձեռնող խմբի անդամներ Արա Պապյանը, Գարեգին Չուգասզյանը և Ժիրայր Սեֆիլյանը հանդիպել են Հայաստանի Հանրապետությունում Իրանի Իսլամական Հանրապետության արտակարգ և լիազոր դեսպան Աբբաս Զոհուրիի և այլ պատասխանատու դիվանագետների հետ։ Տարածված հաղորդագրության համաձայն` հանդիպման ընթացքում քննարկվել են տարածաշրջանային քաղաքական, տնտեսական, էներգետիկ, երկաթուղային և ավտոմոբիլային հաղորդակցության և այլ ոլորտների՝ փոխադարձ հետաքրքրություն ներկայացնող հարցեր։ Նաև պայմանավորվածություն է ձեռք բերվել հանդիպումները շարունակական դարձնելու վերաբերյալ։
«Առաջին լրատվականը» «Ազգային-ժողովրդավարական բևեռ» նախաձեռնող խմբի անդամ Գարեգին Չուգասզյանից հետաքրքրվեց` ո՞րն էր հանդիպման շարժառիթը, ինչո՞ւ ընտրվեց հենց Իրանը. «Արտառոց որևէ բան չկա: Քանի որ մենք կարևորում ենք Հայաստանի ինքնիշխանության ամրապնդումը, ապա դրա կարևոր ուղղություններից մեկը համարում ենք միջազգային գործընկերների հետ հանդիպումները: Քանի որ «Ազգային-ժողովրդավարական բևեռը» նորաստեղծ կազմակերպություն է, ցանկություն ենք հայտնել հանդիպել գործընկեր երկրների դեսպանների, դեսպանատան այլ ներկայացուցիչների հետ: Հավելեմ, որ մենք կարևորում ենք Իրանի`որպես ռազմավարական նշանակության հարևան և բարեկամ երկրի դերակատարությունը: Մեր նախաձեռնության շատ անդամներ նաև նախկինում են հանդիպումներ ունեցել Իրանի դեսպանատան նախկին և ներկա դեսպանների, դեսպանատան ներկայացուցիչների հետ»: Մեր այն դիտարկմանը, թե հանդիպման ընթացքում նաև որոշակի դժգոհություններ են ներկայացվել Հայաստանում առկա իրավիճակի հետ կապված, Գ. Չուգասզյանը պատասխանեց․ «Ձեր պնդումը չի համապատասխանում իրականությանը: Քննարկել ենք հայ-իրանական հարաբերությունների հեռանկարները, ինչ խոչընդոտներ կան այդ հարաբերությունների զարգացման ճանապարհին, և թե մենք ինչպես կարող ենք օգնել առկա խոչընդոտների հաղթահարման ճանապարհին»: Մեր այն հարցին, թե արդյոք բարյացակա՞մ էր իրանական կողմի վերաբերմունքը, Չուգասզյանը պատասխանեց․ «Այն փաստը, որ ձեռք է բերվել պայմանավորվածություն հանդիպումները շարունակական դարձնելու մասին, արդեն խոսուն է»: Մեր զրուցակիցը նաև տեղեկացրեց, որ բևեռը հայ- իրանական հարաբերություններին առնչվող նախագծեր է պատրաստում, որոնք առաջիկայում կհրապարակվեն։ «Դրանցից առաջինը վերաբերում է երկաթուղային հաղորդակցությանը»: Պարոն Չուգասզյանը նաև տեղեկացրեց, որ առաջիկայում կլինեն հանդիպումներ այլ պետությունների դեսպանատների ներկայացուցիչների հետ: Դրանց մասին կտրվի լրացուցիչ տեղեկություն:
