Ռուսաստանյան լրատվամիջոցներում հակափաշինյանական հոդվածները, ռուս քաղաքագետների ակնհայտ հակաիշխանական արձագանքները Հայաստանում տեղի ունեցող ներքաղաքական պրոցեսների շուրջ համեմվեցին «Բարգավաճ Հայաստանի» պատգամավորների ու Հայաստանում ՌԴ դեսպան Սերգեյ Կոպիրկինի հանդիպումով։
ՌԴ դեսպանության ֆեյսբուքյան էջից տեղեկանում ենք, որ հունիսի 17-ին Ռուսաստանի դեսպանատանը տեղի է ունեցել Հայաստանում Ռուսաստանի արտակարգ և լիազոր դեսպան Սերգեյ Կոպիրկինի հանդիպումը Հայաստանի Հանրապետության Ազգային ժողովի նախագահի տեղակալ Վահե Էնֆիաջյանի և Հայաստանի Հանրապետության Ազգային ժողովի տարածաշրջանային հարցերի և եվրասիական ինտեգրման հարցերի մշտական հանձնաժողովի նախագահ Միքայել Մելքումյանի հետ: Զրույցի ընթացքում կողմերը քննարկել են ռուս-հայկական միջխորհրդարանական կապերի զարգացմանը, կորոնավիրուսային վարակի դեմ պայքարում Ռուսաստանին ցուցաբերվող աջակցությանը ուղղված հարցեր:
Խորհրդարանականները նաև կիսվել են իրենց տեսլականով երկրի ներքաղաքական օրակարգի որոշ խնդիրների վերաբերյալ։
Քաղաքագետ Ռոբերտ Ղևոնդյանի կարծիքով՝ տեղի ունեցած հանդիպումը միանգամայն նորմալ է, որովհետև Ռուսաստանը Հայաստանում ունի շահեր, որոնք նա հետապնդում է՝ հաշվի առնելով քաղաքական դաշտի ընդհանուր լանդշաֆտը։ «Կան նաև հիմնավոր պնդումներ, որ «Բարգավաճ Հայաստան» կուսակցությունը շատ թելերով կապված է Ռուսաստանի հետ։ Բելառուսի նախագահի և Ծառուկյանի շփումներն էլ ընկերական են։ Կապված լինել Բելառուսի հետ, իսկ Ռուսաստանի՝ ոչ, բավականին բարդ է մեր տարածաշրջանում։ Ամենայն հավանականությամբ, «Բարգավաճ Հայաստանը» ունի որոշակի հարաբերություններ նաև ռուսական որոշ շրջանակների հետ»,- «Առաջին լրատվական»-ի հետ զրույցում ասաց նա։
Ղևոնդյանի դիտարկմամբ՝ նորություն չէ նաև ռուսաստանյան տարբեր փորձագետների, լրատվամիջոցների հակափաշինյանական դիրքորոշումը. «Նրանք փորձում են հայ-ռուսական հարաբերություններում այնպիսի մթնոլորտ ստեղծել, որպեսզի Կրեմլի համար շատ ավելի հեշտ լինի Հայաստանից ավելի մեծ մասնաբաժին ստանալ տարբեր հարցերի շուրջ։ Հաշվի առնելով, որ մոտակա օրերին սպասվում է Նիկոլ Փաշինյանի այցը Ռուսաստան՝ Հաղթանակի շքերթին մասնակցելու համար, ամենայն հավանականությամբ, դրա հետ կապված ռուսական լրատվամիջոցները կարող է պատվեր ստացած լինեն թե՛ Կրեմլից և թե՛ ռուսական ամենատարբեր շրջանակներից։ Նրանք աշխատում են բավականին ռացիոնալ, և այդ ռացիոնալության հիմքում ընկած է Ռուսաստանի պետական շահը»։
Ինչ վերաբերում է մեր հասարակության արձագանքին Ռուսաստանի այսօրինակ պահվածքի շուրջ, մեր զրուցակիցն ասաց. «Իմ ստացած տպավորությամբ, հասարակության մեջ կա Հայաստանի ինքնիշխանության ամրապնդման միտում։ Իհարկե, ցանկացած այլ երկրի, այդ թվում՝ Ռուսաստանի կողմից Հայաստանի ներքին հարցերին խառնվելու փորձ կամ որևէ արտաքին երևույթ վատ արձագանք է գտնում Հայաստանի հասարակության հիմնական մասի մոտ։ Կա հասարակության որոշակի հատված, որն ակնհայտ ռուսամետ է, նրանք ընդհակառակը՝ գտնում են, որ ռուսական ազդեցությունը պետք է Հայաստանին։ Բայց ներկա իրավիճակում նրանց թիվը բավականին փոքր է և լուրջ ազդեցություն չունի քաղաքական գերակայությունների հարցում։ Հասարակության մեծ մասն ինքնիշխանության կողմնակից է, այդ իսկ պատճառով Ռուսաստանի կողմից դրսևորած այս երևույթները հասարակության կողմից բացասական արձագանք են ստանում, ինչն, իհարկե, Ռուսաստանի շահերին համահունչ չէ։ Դրանից կարելի է հետևություն անել, որ Հայաստանում կան ուժեր, որոնք Ռուսաստանին պատկերը ներկայացնում են ոչ այնպես, ինչպես կա իրականում։ Լավ կլիներ՝ ՀՀ իշխանությունն այդ ուղղությամբ ավելի ինտենսիվ աշխատանք տաներ, որպեսզի Ռուսաստանի կողմից եկող ազդակներն ավելի շատ համապատասխանեին Հայաստանի պետական շահերի հետ»։
Քաղաքագետ Արմեն Վարդանյանի կարծիքով՝ հանդիպումը մեծ նշանակություն չի ունենա։ «Ռուսաստանն այն երկիրը չէ, որ մարդու իրավունքների խախտման հարցով խառնվի Հայաստանի ներքին գործերին։ Եվրոպական կառույցներն են մոնիթորինգի ենթարկում Հայաստանի Հանրապետությունն այդ հարցերով և այդ կառույցների գնահատականն ավելի էական է»,- «Առաջին լրատվական»-ի հետ զրույցում ասաց նա։
Միևնույն ժամանակ քաղաքագետը հավելեց. «Ռուսաստանն, իհարկե, կփորձի իր լծակներով ճնշում գործադրել Փաշինյանի վրա։ Բայց, հաշվի առնելով այն փաստը, որ թավշյա հեղափոխությունից հետո նրանց լծակները փոքրացել են՝ մեծ հաջողության չեն հասնի։ Շանսերը, որ կհաջողեն Ծառուկյանի հարցում, շատ փոքրաթիվ են»։
