Միացյալ Նահանգները Գրենլանդիայում հյուպատոսարան վերաբացեցին՝ չանցած մեկ տարի այն բանից հետո, երբ Նախագահ Դոնալդ Թրամփը հայտարարեց, թե շահագրգռված է կղզին գնել։ Այդ մասին հաղորդում է «Եվրոպական ճշմարտությունը»՝ հղում անելով Politico-ին:
ԱՄՆ պետքարտուղար Մայք Պոմպեոն հայտարարել է կղզու մայրաքաղաք Նուուկում հյուպատոսություն բացելու մասին:
«Մեր ներկայությունը Նուուկում կամրապնդի մեր արկտիկական դաշնակիցների հետ գործընկերությունը և կբարելավի մեր ընկերների բարեկեցությունը Դանիայում և Գրենլանդիայում: Շնորհակալություն ենք հայտնում մեր դաշնակիցներին՝ այս կարևոր իրադարձությունը կյանքի կոչելու համար», – գրել է Պոմպեոն Twitter- ում:
ԱՄՆ-ի դիվանագիտական ներկայացուցչությունը Նուուկում գործել է 1940-1953 թվականներին:
Հայտարարությունն արվել է այն բանից հետո, երբ Սպիտակ տունը հանձնարարեց սառցահատների նոր նավատորմ ստեղծելու պլան մշակել Արկտիկայում և Անտարկտիդայում ԱՄՆ-ի «մշտական» ներկայությունը ապահովելու համար:
2019-ի օգոստոսին Թրամփը հայտարարեց, որ դիտարկում է Դանիական ինքնավար տարածքը գնելու գաղափարը՝ Twitter- ում տեղադրելով փոքրիկ գունագեղ փայտե տներով ափամերձ մի գյուղի լուսանկար՝ Թրամփի հսկա աշտարակով:
«Խոստանում եմ Գրենլանդիայի հետ այդպես չվարվել» – գրել էր նա այն ժամանակ:
Դանիայի վարչապետ Մեթե Ֆրեդերիկսենը արձագանքեց՝ ասելով, որ Գրենլանդիան չի վաճառվում, և որ «սա աբսուրդ քննարկում է»:
Դրանից կարճ ժամանակ անց Թրամփը հայտարարեց, որ հետաձգում է նախատեսվող ուղևորությունը Դանիա:
