Հունիսի 5-ին Երևան քաղաքի ընդհանուր իրավասության դատարանի դատավոր Դավիթ Բալայանը քրեական գործը դատական քննության նախապատրաստելու փուլում, դեռ մինչև դատական նիստի նշանակումը կարճել է դատավոր Դավիթ Գրիգորյանի և դատական նիստերի քարտուղար Գոռ Վարդանյանի գործի վարույթը:
Հիշեցնենք, որ Դավիթ Գրիգորյանին մեղադրանք էր առաջադրվել պաշտոնեական կեղծիք կատարելու համար՝ ՀՀ քրեական օրենսգրքի 314-րդ հոդվածի 1-ին մասով (2 դրվագ), իսկ դատական նիստերի քարտուղար Գոռ Վարդանյանին` դատավորի նկատարած պաշտոնեական կեղծիքին օժանդակելու համար՝ ՀՀ քրեական օրենսգրքի 38-314-րդ հոդվածի 1-ին մասով (2 դրվագ):
ՀՀ քրեական դատավարության օրենսգրքի 292 հոդվածով՝ քրեական գործը վարույթ ընդունելու պահից 15 օրվա ընթացքում դատավորը կարող է կայացնել մի քանի, այդ թվում՝ քրեական գործի վարույթը կարճելու կամ քրեական հետապնդումը դադարեցնելու մասին որոշում:
Պաշտպանական կողմը միջնորդություն էր ներկայացրել դատարան այն մասին, որ ապօրինի ճանաչված ապացույցները բացառում են անձի նկատմամբ քրեական հետապնդումը:
Հիշեցնենք, որ Դավիթ Գրիգորյանը, լինելով Երևանի ընդհանուր իրավասության դատարանի դատավոր, վարույթ էր ընդունել Ռոբերտ Քոչարյանի ու մյուսների քրեական գործը, այդ գործի շրջանակներում անձնական երաշխավորությունների հիման վրա 2019 թվականի մայիսի 18-ին կալանքից ազատ էր արձակել Ռոբերտ Քոչարյանին:
Դավիթ Գրիգորյան դատավորի լիազորությունները, նրա վերաբերյալ քննվող քրեական գործով պայմանավորված, կասեցվել էր 2019 թվականի հուլիսից:
Մեզ հետ զրույցում Դավիթ Գրիգորյանի շահերի պաշտպան, փաստաբան Գեորգի Մելիքյանն այս գործի առնչությամբ ասել էր հետևյալը. «Քրեական գործ հարուցելու որոշումը ապօրինի լինելու պայմաններում քրեական հետապնդումն ինքնին անօրինական է, այսինքն՝ առերևույթ քրեական գործ հարուցելու որոշման ապօրինության դեպքում քրեական հետապնդում չի կարող իրականացվել: Դավիթ Գրիգորյանի գործով կա վերաքննիչ քրեական դատարանի՝ օրինական ուժի մեջ մտած դատական ակտը՝ 2019 թվականի օգոստոսի 5-ի որոշումը, որը փաստել է, որ քրեական գործ հարուցելու որոշմամբ՝ 2019 թվականի հունիսի 18-ի որոշման մասին է խոսքը, գլխավոր դատախազը չի հաղթահարել դատավորի անձեռնմխելիությունը, մասնավորապես՝ չի ստացել ԲԴԽ-ի համաձայնությունը՝ դատավորի նկատմամբ քրեական հետապնդում իրականացնելու վերաբերյալ: 2019 թվականի դեկտեմբերի 2-ի որոշմամբ Վճռաբեկ դատարանը մերժել է գլխավոր դատախազի բողոքը, և Վերաքննիչ քրեական դատարանի որոշումը մտել է օրինական ուժի մեջ:
Հիմա ելնեն երկինք, իջնեն ներքև՝ կոպիտ ասած, Դավիթ Գրիգորյանի քրեական հետապնդումը ապօրինի ու դատապարտված է: Ով էլ լինի դատավորը, եթե անգամ գործը դատաքննության գործընթաց մտնի, ինքնին ապօրինի է քրեական հետապնդումը: Քրեական գործի հարուցման ապօրինի լինելու պայմաններում ինչ ապացույց էլ ձեռք բերեն, բոլորը անթույլատրելի են: Ըստ էության՝ ամբողջ նախաքննությունն ինքնին անօրինական է»:
Փաստաբան Գեորգի Մելիքյանը իր ֆեյսբուքյան էջում գրառել է. «Այսօր երկարատև հիվանդությունից հետո վախճանվեց դատավոր Դավիթ Գրիգորյանի նկատմամբ ապօրինի իրականացվող քրեական հետապնդումը և ի շնորհիվ դատավոր Դավիթ Բալայանի արդարացման ակտի վերջինս արդարացվեց։ Ցավակցում ենք ՀՔԾ և դատախազությանը»:
