Facebook-ի ղեկավար Մարկ Ցուկերբերգը հայտարարել է, որ այս սոցցանցում Միացյալ Նահանգների նախագահ Դոնալդ Թրամփի բազմաթիվ գրառումներ վիրավորական է համարում, բայց մտադիր չէ դրանք գրաքննության ենթարկել, հաղորդում է The Wall Street Journal-ը:
Պարբերականի համաձայն, Ցուկերբերգը նման հայտարարությամբ հանդես է եկել ընկերության աշխատակիցների հետ հանդիպման ժամանակ, որոնցից շատերը բողոքում են անկարգությունների վերաբերյալ սոցցանցերում Թրամփի արած գրառումների հետ կապված ղեկավարության դիրքորոշման դեմ:
Ցուկերբերգը կարծում է, որ մասնավոր ընկերությունները չպետք է վերահսկողական գործառույթներ ստանձնեն և մատնանշեն քաղաքական գործիչների ենթադրյալ խախտումները:
Մայիսի 25-ին իրավապահների կողմից աֆրոամերիկացի Ջորջ Ֆլոյդի ձերբակալության ժամանակ ոստիկանը ծնկով սեղմել է տղամարդու պարանոցը: Ֆլոյդը բղավել է, որ խեղդվում է, բայց ոստիկանները ուշադրություն չեն դարձրել: Արդյունքում տղամարդը մահացել է վերակենդանացման բաժանմունքում: Սա ամբողջ երկրում զանգվածային բողոքի ցույցերի անցկացման պատճառ է դարձել: